Ити сыалга сылын ахсын 500 мөл. солкуобай федеральнай бүддьүөттэн көрүллүө. Сынньалаҥ уһуна 7-21 хонук буолар, V-VIII кылаас  үөрэнээччилэрэ хабыллыахтара. Ити көрүллүбүт үбүнэн путевка эрэ буолбакка, сынньанар сирдэригэр айанныыр ороскуоттара эмиэ төлөнүө. Сабаҕалаан ааҕыынан, бу көмөнөн дойду Аартыкатыгар олорор 6 тыһыынча оҕо туһаныа. Манна биһиги өрөспүүбүлүкэбит 13 оройуона эмиэ хапсар. 

Кыһынын күнү көрбүт оҕолорбут Хара, Азовскай, Каспийскай, Дьоппуон муораларыгар сөтүөлээн, Кавказ минеральнай ууларын иһэн, Краснодар кыраайыгар, Кырыымҥа сынньанан, күүс-сэниэ ылыахтара, доруобуйаларын бөҕөргөтүөхтэрэ. 

Михаил Мишустин 2021 сыл кулун тутар ыйыгар “Аартыка оҕолоро” бырайыагы РФ Судаарыстыбаннай былааныгар киллэрэр туһунан эппитэ. Бу ситимнээх үлэ саҕаламмытын туоһута.