Биһиги Ньурба улууһун баһылыгын бастакы солбуйааччыта, улуустааҕы ыксаллаах быһыы-майгы хамыыһыйатын бэрэссэдээтэлэ Артур Яковлевтан кэмэнтээрий ыллыбыт:

-- Бүгүҥҥү туругунан Ньурбаҕа 12 ойуур баһаара умайар. Нэһилиэнньэттэн 73 киһи, федеральнай тэрилтэ 120 үлэһитэ баһаардары умулларыыга үлэлииллэр. Чаппанда сэлиэнньэтин таһыгар турбут ойуур баһаарыгар уот линиялара эмсэҕэлээтилэр.  Аҕыс баҕана уокка былдьаммыта. Ол түмүгэр Хатыы, Маалыкай, Малдьаҕар, Чуукаар, Өҥөлдьө, Дьиикимдэ, Хорула электрическэй уота суох хаалбыттара. Бөлүүн түөрт баҕананы чөлүгэр түһэрдибит. Билигин уот былдьаабыт электрическэй линия тирэҕин чөлүгэр түһэриигэ икки биригээдэ үлэлии сылдьар. «Якутскэнерго» улуустааҕы салаатын начальнига Александр Иванович Егоров сөмөлүөтүнэн уот ситимэ төһө эмсэҕэлээбитин быһаара көттө,  10 федеральнай күүс үлэһиттэрэ көмөҕө барыстылар. Сарсын сарсыарда уот ситимин чөлүгэр түһэрэн, уота суох хаалбыт нэһилиэктэргэ холбуохпут диэн эрэллээхпит.