Доруобуйаны икки түһүмэҕинэн бэрэбиэркэлиэхтэрэ. Бэрэбиэркэ бастакы түһүмэҕэр сыстыгана суох дьарҕа ыарыылары булуу уонна мэдэссиинэ 7 чинчийиитэ (уопсай уонна биохимическай хаан анаалыһа, сатурация, спирометрия, рентген уо.д.а.) киирэр. Дьаҥынан ыалдьыбыт дьон хааннара төһө хойдубутун быһаарар эбии анаалыһы туттарыахтара.

Бу чинчийиилэри барытын биир күн иһигэр оҥоруохтара. Ол түмүгүнэн быраастар дьарҕа ыарыы баарын, суоҕун быһаарыахтара. Ыарыы көстүбүт буоллаҕына, бэрэбиэркэ иккис түһүмэҕэр ыытыахтара. Иккис түһүмэх 3 көрүҥнээх: эхокардиография, тыҥаны КТ аппараакка түһэрии уонна атах тымырдарын доплерынан көрүү.

"Эмтэниигэ наадыйар дьон чөлгө түһэрэр процедуралары, наадалаах эмтэниини толору ылыахтара" диэн Доруобуйа харыстабылын министиэристибэтэ иһитиннэрэр. Соvid дьаҥар ыарахан уонна орто туругунан ыалдьыбыт дьон бэрэбиэркэни маҥнайгынан ааһыахтара. Кинилэргэ көрдөрүнэр (сыһыарыллыбыт) поликлиникаларыттан эрийиэхтэрэ. Маны таһынан “көрдөрүнэ кэл” диэн иһитиннэриини төлөпүөҥҥэ, электроннай почтаҕа эбэтэр Судаарыстыба өҥөтүн порталыгар тус кэбиниэккэр ыытыахтара.

Доруобуйа харыстабылын миниистирэ Михаил Мурашко от ыйын 1 күнүттэн бары эрэгийиэннэргэ тэрийиэх буолан эрэннэрдэ. Онно анаан бүддьүөттэн 6 млрд кэриҥэ үбү көрөллөр.