Мунньах “Биир ньыгыл Арассыыйа” уопсастыбаннай приемнайыгар буолла. СӨ Доруобуйа харыстабылыгар миниистирэ Елена Борисова, онкологическай диспансер сүрүн бырааһа  Елена Афанасьева, Өлөөн улууһун кылаабынай бырааһа Назар Петров, «Центр внедрения инновационных технологий «Вектор РС (Я)» тэрилтэ салайааччыта Артем Охлопков, урбаанньыт Эдуард Рехлясов кыттыыны ыллылар.

Кэпсэтии саҕаланыыта Елена Голомарева быһыыны биэрии тэрээһинэ хайдах баран иһэрин, өрөспүүбүлүкэҕэ бу сылы Чэбдигирии сылынан биллэрэннэр, улахан болҕомто мэдиссиинэҕэ ууруллар буолбутун сырдатта.

Бастакы боппуруоһунан хоту улуустартан химиятерапияҕа эмтэнэ кэлэр искэн ыарыылаахтар айаннарын төлөбүрүн, түһэр сирдэрин туһунан буолла. Онколог быраас Елена Афанасьева 2017 сылтан, үрдүкү салалта өйөбүлүнэн, босхо онкоскрининг ыытыллар буолан, рактаах дьону кыра стадияларыгар быһаарар буолбуттарын бэлиэтээтэ.          “Ол курдук, 2020 сыллаахха 11 оройуоҥҥа, ол иһигэр 5 арктическай улууска, биһиги диспансербыт биригээдэлэрэ баран үлэлээбиттэрэ Бэрэбиэркэ түмүгэр хоту улуустартан 18 киһиэхэ куһаҕан искэни булбуппут. Кинилэр көрдөрө кэлэллэригэр айаннарын ороскуота олус улахан. Аны, манна олорор сирдэрэ суох”, -- диэтэ. Онуоха миниистир Елена Борисова: “Ити боппуруоһу быһаара сылдьабыт. Хостеллары арендалаан биэрэр варианы көрөбүт”, -- диэтэ.

Иккиһинэн, сытар ыарыһахтары үөһэнэн аҕаларга сөмөлүөккэ анал оборудование наадатын туһунан буолла. “Ил Дархан СӨ Тырааныспарга министиэристибэтигэр бу чааһынан сорудахтаабыта. Олор хонтуруоллуохтаахтар”, -- диэн миниистир хоруйдаата.

Аартыка быраастарын идэлэрин таһымын үрдэтэр куурустарга үөрэттэрэн, судмедэкспертизаны миэстэтигэр ыыталларыгар лицензияны биэрии боппуруоһугар Елена Афраимовна: “Судебно-медицинскэй экспертиза базатыгар кафедра арыйбыппыт. Онно хирурдар кэлэн үөрэнэллэр. Быйыл Булуҥтан кэлэн уһуйуллан, көҥүл ылбыттара”, --диэтэ.

“С” гепатиттара дьарҕаҕа кубулуйбут дьону эмтиир эрэгийиэннээҕи бырагыраама бырайыагын бэлэмнээбиттэрин, ол бигэргэтиигэ сытарын эттилэр. Эдуард Рехлясов: “Владимир Путин 2021-2030 сылларга түһүмэҕинэн бу ыарыыны утары охсуһар тэрээһиннэри ыытарга, ону үбүлүүргэ эппитэ”, -- диэн, тустаах ыарыы федеральнай таһымҥа улахан өйөбүлү ылбытын кэпсээтэ.

 «Центр внедрения инновационных технологий Вектор РС (Я)» салайааччыта Артем Охлопков сахалар Бехтерев ыарыытынан ханнык да омуктааҕар ордук ыалдьалларын тоһоҕолоон эттэ. “Аныгы терапия ньыматынан эмтиэхпитин, көдьүүстээх эминэн хааччыйыахпытын, ЛФК дьарыктары тэрийиэхпитин наада. Уонна учуонайдарбыт бу ыарыыны иҥэн-тоҥон чинчийэллэрэ эбитэ буоллар”, -- диэн баҕа санаатын биллэрдэ.

Өлөөн кылаабынай бырааһа Назар Петров ковидтаабыт дьону ыраах нэһилиэнньэлээх пууннартан аҕаларга бөртөлүөт, оттон кыһынын ыарыһахтары Дьокуускайга, Мииринэйгэ таһар табыгастаах оптуобус туруоруста.

СӨ Доруобуйа харыстабылыгар миниистирэ Елена Борисова Өлөөҥҥө вакцинация хампаанньатын күүһүрдэргэ уонна тэтимирдэргэ соруйда. Федеральнай сокуоҥҥа уларыйыы киирдэҕинэ, чааһынай авиацияны туһаныахха сөбүн эттэ.