«Бүгүн-сарсын “Спутник Лайт” вакцина 50 тыһ. дозата кэллэҕинэ, быһыыны иккис төгүллээн биэрии тэрээһинин саҕалыахпыт”, -- диэн суһал ыстаап салайааччытын солбуйааччы Ольга Балабкина брифиҥҥэ эттэ.
Иккис төгүллээн быһыыны (ревакцинация) «Спутник V» эбэтэр «ЭпиВакКорона» вакциналар иккис компоненнарын ылбыт дьоҥҥо алта ый буолан баран туруораллар. Биирдэ бэриллэр «Спутник Лайт» вакцина коронавируһунан ыалдьан баран үтүөрбүт уонна бастакытын быһыы ылар дьоҥҥо бэриллиэн сөп.
Ольга Балабкина ыраах сытар нэһилиэнньэлээх пууннарга дьаҥы утары үлэ хайдах ыытылларын кэпсээтэ: «Халлаан туругунан ыраах сытар нэһилиэнньэлээх пууннарга санавиация көтөр кыаҕа суох, онон биһиги телемедицинанан сүбэ биэрии үлэтин күүһүртүбүт. Эмиэ халлаан туругуттан сылтаан 10 күн анараа өттүгэр кэлбит вакциналары сорох улуустарга сатаан тиэрдибэккэ сылдьабыт. Бүгүн Абый уонна Ленскэй оройуоннарга вакцинаны анал рейсинэн илдьиэхтэрэ».
- 0
- 0
- 0
- 0
- 0
- 0