Үгэс курдук, киин куорат олохтоохторугар уонна ыалдьыттарыгар бу күннэргэ Амма, Чурапчы, Мэҥэ Хаҥалас, Хаҥалас улуустарыттан астыыр-үөллүүр тэрилтэлэр уонна бааһынай хаһаайыстыбалар эт уонна үрүҥ ас эгэлгэтин тоҕу тардан кэбиһиэхтэрэ. Маны таһынан “Дьокуускайдааҕы балык хампаанньата” ХЭУо-ны сэргэ “Булуҥ” МУТ, “Ас-балык”, “Хоту Балык”, “Кэбээйи балыга”, “Севернэй”  ХЭУо-лар, Анаабыртан Андросов аатынан МУТ быйылгы муус аннынан бултаммыт балыктарын атыыга таһаарыахтара.

Маннык өрөбүл күн дьаарбаҥката быйыл Тыа хаһаайыстыбатын министиэристибэтин өйөбүлүнэн 12-с төгүлүн ыытыллар. Тэрийээччи – “Саха астара” ТХПК. Сылтан сыл кыттааччыта уонна атыылаһааччыта элбээн иһэрин тэрийээччилэр бэлиэтииллэр. Ити гынан баран, быйылгы тэрээһин ураты быһыыга-майгыга ыытылларынан, хас биирдии атыылаһааччы харыстанар мааскалаах сылдьара ирдэнэр. Саха сирин алаастарыгар төлөһүйбүт эмис сүөһү-сылгы минньигэс, иҥэмтиэлээх этин атыылаһан, уһун кыһыҥҥа ууруна сылдьан үссэниҥ, ыалдьымаҥ, чэгиэн буолуҥ!