Микробиэрэпискэ үлэлиэн баҕалаах уонна үлэлииргэ сөбүлэспит дьону үөрэтии саҕаланна. Арассыыйа Бырабыыталыстыбатын 2020 с. атырдьах ыйын 29 күнүнээҕи 1315 №-дээх уурааҕар олоҕуран ыытыллар быйылгы микробиэрэпис уратытынан - планшеттар туһаныллыахтара. Санатахха, тыа хаһаайыстыбатын уочараттаах биэрэпиһэ 2026 сылга тэриллэн ыытыллара күүтүллэр. Бу иннинэ 2016 сыллаахха ыытыллыбыта.

Саха сиригэр микробиэрэпискэ 628 тэрээһиннээх хаһаайыстыба, 3222 бааһынай хаһаайыстыба уонна 61345 кэтэх хаһаайыстыба хабыллыахтаахтара сабаҕаланар.

От ыйын 29 күнүгэр биэрэписчиттэргэ анаан Мэҥэ Хаҥалас улуустааҕы социальнай бэлиитикэ управлениетын дьиэтигэр семинар тэрилиннэ диэн Мэҥэ Хаҥалас улуус дьаһалтатын пресс-сулууспата иһитиннэрдэ. Семинары судаарыстыбаннай статистика федеральнай сулууспатын Мэҥэ Хаҥалас улууһун отделын начаалынньыга Аркадий Афанасьев иилээн-саҕалаан ыытта. Кинини кытта семинар хаамыытын  улууска микробиэрэпиһи ыытыыга боломуочунай Светлана Гаврильева уонна солбуйааччыта Варвара Федорова сүрүннэстилэр.

Мэҥэ Хаҥалас оройуонугар биэрэпискэ 27 биэрэписчит уонна 3 инструктор үлэлиэҕэ.

Инструктордарынан Марианна Федотова (Майа), Анатолий Никифоров (Хара), Николай Скрябин (Төҥүлү) үлэлииллэр. Үһүөн тыа хаһаайыстыбатын исписэлиистэрэ. Биэрэписчиттэр баһыйар үксүлэрэ тыа хаһаайыстыбатын исписэлиистэрэ буоланнар, бэйэлэрин нэһилиэктэригэр тыа хаһаайыстыбатын бары чахчыларын илиилэригэр тута сылдьар, ким бородууксуйа ылыллар дьиэ кыылын, көтөрүн иитэрин барытын билэ сылдьар дьон буолаллар.

Биэрэпис чахчылара быраабыла быһыытынан киһи тылыттан суруллаллар, ханнык да докумуон ирдэммэт. Аат-суол, аадырыс ыйыллыбат. Биэрэпис лииһэ биэс разделлаах: бастакыга – төһө киһи олороро, бородууксуйанан бэйэлэрин хааччыныылара, иккиһигэр - атырдьах ыйын 1 күнүгэр төһө бас билэр сирдээхтэрэ, үсүһүгэр - 2021 сыл иккис аҥаарыгар төһө ыһыылаахтара, оҕуруоттара, тэпилииссэлэрэ, төрдүһүгэр – сири туһаныы, бэсиһигэр – бородууксуйа ылыллар кыылларын, көтөрдөрүн ахсаана суруллар.