«Ханнык баҕарар түгэҥҥэ  сүрэххитигэр ырыаны илдьэ сылдьыҥ, оччоҕо өйгүт-санааҕыт ыраас, тулалыыр эйгэҕит кэрэ буолуо. Ырыа күнүнэн, күндү доҕоттор!», - диэн саха эстрадатын тыйаатырын уус-уран салайааччыта Мария Герасимова  кэлэктиибин аатыттан Саха сирин олохтоохторун ырыа күнүнэн эҕэрдэтин тиэрдэр.

Саха эстрадатын чаҕылхай сулуһа, СӨ үтүөлээх артыыһа Анастасия Готовцева ырыаһыт идэтин тоҕо талбытын туһунан ыйытыыга: «Аҕам Иннокентий Готовцев бэйэтин кэмигэр ийэбинээн иккиэн ыллыыллара. Ол иһин адьас кыра эрдэхпиттэн ырыаҕа-тойукка уһуйуллан, этэргэ дылы,  ырыаһыт идэтиттэн атыны баһылыыр кыаҕым суох этэ. Кыра эрдэхпиттэн аҕабын кытта бииргэ сылдьан гастроллаан улааппыт киһибин. Оскуолаҕа үөрэнэ сылдьан, «Кэнчээри” ансаамбылга ыллыырым. Оскуоланы бүтэрэн баран, муусука училищетыгар үөрэнэ киирбит түгэммиттэн баччааҥҥа диэри ырыаны олоҕум аргыһа оҥостон кэллим. Иккистээн да төрүүрүм буоллар син биир ырыаһыт идэтин талыам этэ. Түгэнинэн туһанан, Саха сирин ытык-мааны олохтоохторун барыгытын ырыа күнүнэн итиитик-истиҥник  эҕэрдэлиибин! Ырыаны таптаан истиҥ, ыллааҥ!», - диэн хоруйдаата.

Салгыы саха эстрадатын чаҕылхай сулустарын «Сүрүн түһүлгэ» диэн кэнсиэртэрин көрүҥ, истиҥ.