Бу Улуу Кыайыыны үйэтитэр үтүө аахсыйаны “Биир ньыгыл Арассыыйа” баартыйа “История умнуллубат чахчыта” бырайыагын чэрчитинэн тэрийдэ. Кыайыы дьыктааныгар Арассыыйа бүттүүнэ уонна тас дойду кытынна. Ол курдук, 1376 былаһаакка Арассыыйаҕа, 46 былаһаакка тас дойдуга тэриллэн үлэлээтэ.
Саха сиригэр “История умнуллубат чахчыта” бырайыагы норуот дьокутаата Елена Голомарева үүннээн-тэһииннэн тэрийдэ:
- Биһиги өрөспүүбүлүкэбит Уһук Илиҥҥэ саамай элбэх былаһаакканы бэлэмнээтэ – 285 сиргэ Кыайыы дьыктаана ыытыллар. Сахалин уобалаһа, Хабаровскай кыраай курдук улахан эрэгийиэннэр 40-50 былаһааккалаахтар. Онон Саха сирин олохтоохторо бу Улуу сэриигэ сүгүрүйэрбитин, олохторун толук уурбут дьоммутун кэриэстиирбитин, кинилэр хорсун быһыыларыгар махтанарбытын биллэрэбит.
Муниципальнай тэриллиилэр, бибилэтиэкэлэр, мусуойдар, оскуолалар манна күүскэ ылсан үлэлэстилэр. Бу Кыайыы диктана бэйэтэ куонкурус. Бастыҥнар грамотанан, туоһу суругунан наҕараадаланыахтара.
Ким да умнуллубат, туох да умнуллубат!
Санатар буоллахха, диктантпобеды.рф саайка регистрацияламмыт дьоҥҥо балаҕан ыйын 3 күнүгэр сорудахтара төлөпүөннэригэр эбэтэр көмпүүтэрдэригэр кэлэр, ону толорон ыыттылар. Android уонна iOS платформаларга "Диктант Победы» мобильнай сыһыарыы оҥоһуллубута, билиҥҥи пандемияҕа саамай табыгастаах ньыма.
Дьыктаан түмүгэ бүгүн киэһэ 20.00 биллэр.
«Дьыктаан боппуруостара уустуктар»
Зинаида Дедюкина, учуутал: «Боппуруостара анал идэлээх историк, краевед эбэтэр чахчы сэргиир киһиэхэ анаммыт курдуктар. Көннөрү дьоҥҥо уустук дии санаатым. Бэйэтин анализтанар, дьиэтигэр тиийэн хаттаан бэрэбиэркэлэнэр киһиэхэ быдан туһалаах буолуох эбит. Тест оҥорон баран, киһи тута умнар. Тест буолбакка, арыый судургутук ыытыллыбыта буоллар, тиийимтиэ буолуох эбит. Тиэкиһэ уһуна бэрт, холобур, үөрэхтээх киһи сэргээн, тулуйан-тэһийэн ааҕыан сөп. Оттон түргэн информацияны ыла үөрэммит ыччакка, оскуола оҕолоругар уустук».
Александр Ефремов, Арктикатааҕы култуура уонна искусство институтун устудьуона: «Дьыктааны олус сэргээн суруйдум. Ол гынан баран боппуруостара син уустуктар диэн бэлиэтиибин. Киинэттэн хартыыналар, уордьаннар ойууларын чахчы көрбүт, билэр эрэ киһи хоруйуон сөп. Дьыктаан ыытыллыбытын биһирээтим. Аҕа дойду Улуу сэриитин уонна Улуу Кыайыыны өссө дириҥник, үчүгэйдик билэргэ кыах биэрэр».
- 0
- 0
- 0
- 0
- 0
- 0