Кыһалҕа кымньылаан, ыам ыйын 10 күнүгэр, Ат успуордун федерациятын сүбэ мунньаҕа буолан ааспыт. Онуоха мунньахха туох-ханнык боппуруостар көрүллүбүттэрин федерация бэрэсидьиэнэ, Ил Түмэн дьокутаата Руслан Федотов быһааран билиһиннэрдэ:

– Ат успуордун федерациятын мунньаҕар СӨ Тыатын хаһаайыстыбатын миниистирин солбуйааччы, федерация вице-бэрэсидьиэнэ Николай Афанасьев, федерация чилиэннэрэ, уопсайа 50-ча киһи кытынна. Мунньаҕы, федерация бэрэсидьиэнэ буоларым быһыытынан, бэйэм салайдым. Маны сэргэ СӨ Бырабыыталыстыбатын Бэрэссэдээтэлин солбуйааччы Михаил Никифоров, Дьокуускай мээрэ Евгений Григорьев, Аартыкатааҕы судаарыстыбаннай агротехнологическай университет (АГАТУ) ректорын эбээһинэһин быстах кэмҥэ толорооччу Константин Кривошапкин ыҥырылыннылар. Быһаччы эттэххэ, АГАТУ ипподромун дьылҕатын көрдүбүт. Маныаха РФ Тыатын хаһаайыстыбатын министиэристибэтэ 2017 с. 09.03 14 №-дээх дьаһалынан бигэргэппит Бэрээдэгэр олоҕуран, РФ Тыатын хаһаайыстыбатын министиэристибэтин биэдэмистибэннэй федеральнай судаарыстыбаннай бүддьүөт тэрилтэлэрин быһаччы салайыы быраабыгар бигэргэммит аренда эбэтэр хамсаабат баай-дуол эбийиэктэрин босхо туһаныыга биэриигэ сөбүлэҥҥэ тирэҕирдибит. Ректор эбээһинэстэрин толорооччу Константин Кривошапкин ат успуордун комплексын дьиэтэ уонна ипподром сирэ-уота федеральнай бас билиигэ сылдьалларын эттэ. Ол эбэтэр бу эбийиэктэр РФ Тыатын хаһаайыстыбатын министиэристибэтин салайыытыгар киирэллэр. Кыһалҕаны бары өттүттэн ырытан көрдүбүт. Онуоха Үөһээ Бүлүү федерациятын бэрэссэдээтэлэ Андрей Неустроев, кэтэх аттары бас билээччи Ирина Ивайловская, СӨ Бырабыыталыстыбатын Бэрэссэдээтэлин солбуйааччы Михаил Никифоров, Дьокуускай мээрэ Евгений Григорьев санааларын этиннилэр. Евгений Григорьев куорат тэхиньиичэскэй өттүнэн кыһалҕалаах эбийиэктэрин уопуттарыгар олоҕуран, көньүүһүнэни хайдах өрөмүөннүөххэ уонна бөҕөргөтүөххэ сөбүн үөрэтэргэ, быһаарсарга этии киллэрдэ. Кини быйылгы сылга Үс Хатыҥ ипподромун өрөмүөнүгэр куорат бүддьүөтүттэн 3,5 мөл. солкуобай көрүллүбүт бэлиэтээтэ.

Мин санаабар, аттарбыт бу комплекстан тахсан бардахпытына, Саха сиригэр ат сүүрдүүтүн устуоруйатыгар кириэс туруорабыт. Мантан антах ат сүүрдүүтүн курдук норуот бүттүүнэ сөбүлүүр успуорт көрүҥэ сүтэр-симэлийэр кутталлаах. Федеральнай уорганнар ирдэбиллэрэ олоххо киирэрэ лоп курдук биэс хонук хаалла. Онуоха бары биир дьыала туһугар туруулаһарбыт быһыытынан бэйэ-бэйэбитин өйөһүөҕүҥ диэн ыҥырабын. Уопсай тылы булуоҕуҥ. Дьүүллэһии түмүгүнэн манежтар тэхиньиичэскэй туруктарын хаттаан бэрэбиэркэлииргэ (эрдэ хаарбах туруктаахтара бигэргэммитэ) уонна СӨ Бырабыыталыстыбатын Бэрэссэдээтэлин солбуйааччы Михаил Никифоров таһымыгар туспа мунньах ыытарга быһаардыбыт, – диэн Руслан Еремеевич балаһыанньаны ыйдаҥардан, быһааран биэрдэ. Онон ат сүүрдүүтүн сэҥээрээччилэр бүтэһиктээх быһаарыы тахсарын долгуйа күүтэбит.

Маныаха ыам ыйын 11 күнүгэр АГАТУ ректорын э.т. Константин Кривошапкин РФ Тыатын хаһаайыстыбатын министиэристибэтин кытта өссө төгүл кэпсэтиэхтээх уонна Михаил Никифоровка официальнай суругу ыытыахтаах. Ол кэннэ СӨ Бырабыыталыстыбатын бэрэссэдээтэлин солбуйааччы Михаил Никифоров РФ Тыатын хаһаайыстыбатын миниистирин солбуйааччы М.И. Увайдовы кытта ыам ыйын 15 күнүгэр аттары көньүүһүнэттэн таһаарбат туһунан кэпсэтиэхтээх. Ол кэннэ Михаил Викторович хаттаан сүбэ мунньаҕы тэрийэрэ былааннанар.