Үчүгэйэ диэн, Токиолыын биир “часовой пояска” баарбыт, онон быһа эпиирдэри көрөргө хаһааҥҥытааҕар да табыгастаах буолла. "Матч ТВ", "Россия 1", "Первый"  ханааллар трансляцияны оҥороллор.  

Түөрт күн түмүгүнэн билиҥҥитэ төрдүс иһэбит: эмиэрикэлэр, дьоппуоннар, кытайдар кэннилэриттэн. Барыта 12 мэтээллээхпит: 4 кыһыл көмүс, 5 үрүҥ көмүс, 3 боруонса. Бэһис күнү эмиэ ситиһиилээхтик саҕалаатыбыт. Онон инники күөҥҥэ сылдьарга эрэллээхпит.

Өссө биир үчүгэй сонун --- Олимпиада бүппүтүн кэннэ, атырдьах ыйын 25 күнүттэн балаҕан ыйын 5 күнүгэр диэри Токиоҕа ыытыллар Паралимпиадаҕа Саха сирин 3 спортсменката кыттыаҕа.

Харбааһыҥҥа аан дойду уонна Европа чөмпүйүөнэ, Пекиҥҥэ 2008 с. буолбут Паралимпиадаҕа баттерфляй ньыматынан 50 м харбааһыҥҥа иккис миэстэлээх, Арассыыйа спордун үтүөлээх маастара, СӨ “Хотугу сулус” уордьанын кавалера Анастасия Диодорова.

Ох саанан ытыыга 2012 с. Паралимпиада боруонса мэтээлин хаһаайына, норуоттар икки ардыларынааҕы кылаастаах маастар, РФ спордун үтүөлээх маастара Степанида Артахинова.

Олорон эрэ волейболга  РФ дьахталларын сүүмэрдэммит хамаандатыгар киирсэн, 2018 с. аан дойдуга, 2017, 2019 сылларга Европаҕа чөмпүйүөннээбит, РФ спордун үтүөлээх маастара Алена Дмитриева.

         Онон кыргыттарбытыгар ыалдьабыт. Манна даҕатан эттэххэ, Паралимпиадаҕа Арассыыйа сүүмэрдэммит хамаандатыгар 50 субъектан 241 спортсмен талыллан киирдэ. Итинтэн 129-тэ – эр дьон, 112 – дьахтар.