Камералары Үөһээ Бүлүү сэлиэнньэтин дьаһалтатын сакааһынан холбоотулар. “Нэһилиэнньэҕэ куттала суох буолууну хааччыйар туһуттан элбэх камераны туруортардыбыт. Быйылгы сыл саҕана бастаан биэс видеокамера туруортарбыппытыгар, уулуссаҕа буруйу оҥоруу аҕыйаабыта. Видеонан кэтээһин көдьүүйэ көстөн турар”, -- диэн сэлиэнньэ баһылыга Максим Силигиянов улуус пресс-сулууспатыгар иһитиннэрбит.

“Биһиги исписэлиистэрбит камералары “Ростелеком” ситимигэр холбоотулар, камералар төгүрүк суукка усталлар, уһуллубут матырыйааллар биһиги тэрилтэбит анал хараллар сиригэр кэлэллэр. Кэтиир видеокамераҕа эбии өҥө холбуохпутун сөп. Холобур, киһи ахсаанын, кинилэр дьахтар, эр дьон буолалларын, хас саастаахтарын билэр, киһини биометрическай дааннайдарынан көрдөөһүн өҥөлөрүн. Бу камералар -40 С, +60 С диэри температураны тулуйаллар”, -- диэн “Ростелеком” филиалын диэриэктэрин сүбэһитэ Прокопий Неустроев быһаарбыт.