Моорукка саҥа талыллыбыт баһылык Айсен Игнатьев көрсөн, туох үлэ бара турарын кэпсээтэ. Чуолаан спортивнай саала тутуллан эрэрин көрдөрдө. Улуус баһылыга ити спортивнай саалаҕа сыһыары оскуола бырайыага оҥоһуллуон наадатын ыйда.
Бүтэйдээххэ гаас ситимин тардыы тэтимнээхтик бара турар. “Күөх төлөн» элбэх ыалга тиэрдиллибитэ тута харахха быраҕыллар, эһиил өссө 210 олбуорга диэри гаас ситимэ тардыллыахтаах. От былаанын аһары толорбуттара хайҕаллаах суол. Нэһилиэнньэни көҕүлүүр бырагырааманан (ППМИ) спортивнай былаһаакка сиппит-хоппут, Кыайыы болуоссата бүтэн эрэр.
Өлөчөйгө быыбар түмүгүнэн саҥа талыллыбыт баһылык Николай Матчитов, икки оскуола салайааччыта көрсөн, туох кыһалҕалар баалларын кэпсээтилэр. Ол курдук, национальнай бырайыагынан 5 мөл.солк. көрүллэн, арочнай спортивнай саала саҥалыы уларытыллан оҥоһуллуута түмүктэнэн эрэр.
Саамай сытыы кыһалҕа уунан хааччыллыы буоларын этэн туран, баһылык скважина боппуруоһун туруорсуу үлэтин саҕалаабытын билиһиннэрдэ. Итиэннэ саҥа оскуола бырайыага, кулууп тутуута курдук кэскиллээх боппуруостар тула кэпсэтии буолла.
Интэринээт, оҕо уһуйаанын дьиэлэрэ саахалланар турукка киирбиттэрэ элбэх уустуктары үөскэппит. Итиэннэ гаас ситимэ бөһүөлэк таһынан ааһар эрээри, Өлөчөйгө киирэ илигин олохтоохтор күүскэ туруорсаллар.
Табаҕаҕа тыа хаһаайыстыбатын бородууксуйатын оҥорон таһаарар урбаанньыт Р.Р. Герасимов эбийиэктэрин көрдөрдө. Алта нэһилиэктэн үүтү тутан астыырын таһынан, күҥҥэ 100 киилэ голландскай сыыры оҥорор сыах, ыраас ууну уонна отонтон утахтары оҥорор туспа дьиэ тутулла турарын көрдөрдө.
Ити сырыынан сиэттэрэн улуус баһылыга Николай Старостин нэһилиэк баһылыктарыгар былааннаммыттара олоххо киирэригэр туһаайда. Салгыы бииргэ үлэлэһэргэ, улуустан талыллыбыт Ил Түмэн дьокутааттарын кытта биир ситимнээх үлэ салгыы өссө тэтимнээхтик барыахтааҕын тоһоҕолоон эттэ. Күһүҥҥү кэмҥэ, кыстыкка бэлэми көрө-истэ өссө да атын нэһилиэктэргэ сырыы салҕанан барыа.
- 0
- 0
- 0
- 0
- 0
- 0