Маннык видеокамералар буруйу оҥоруу, араас дэҥ-оһол тахсыбатын туһугар, бэрээдэги кэһиини сэрэтэр итиэннэ быһыыны-майгыны, барыыны-кэлиини, түүннэри сырыыны хонтуруоллуур сыалтан туруоруллаллар. Бу үлэ нэһилиэккэ улууһу кытта тэҥҥэ биллэриллибит Дьиэ кэргэн экономикатын сылын чэрчитинэн ыытылынна, онуоха олохтоох дьаһалта бэйэтин бүддьүөтүттэн 50 тыһыынча солкуобайы көрбүт.
Прокопий Бубякин, нэһилиэк баһылыга:
– Бу бырайыак улуустааҕы полиция отделын (начальник полиция Василий Стрекаловскай) уонна “Ростелеком” АУо филиалын (начальник Иннокентий Слепцов) кытары бииргэ үлэлэлээһин түмүгэр олоххо киллэрилиннэ. Сайдыылаах арҕааҥҥы дойдуларга видеокамера бэрээдэги кэһиини сэрэтэр биир сүрүн ырычаах буолар. Хас биирдии ыал нус-хас олоҕу олоруон баҕарар. Быйылгы 2021 сыл улуус баһылыгын, Николай Архипов, дьаһалынан Дьиэ кэргэн экономикатын сылынан биллэриллэн, нэһилиэктэр икки ардыларыгар социальнай-экономическэй сайдыы күрэхтэһиитэ тэриллибитэ. Балаһыанньа быһыытынан, сыл устата сөптөөх үлэни-хамнаһы ыытан, отучча социальнай-экономическэй критерийинэн көрдөрүүтүн тупсаран, бастаабыт нэһилиэк “МТЗ-82” тыраахтарынан, иккис миэстэни ылбыт нэһиликэ «УАЗ» массыынанан, үһүс миэстэҕэ тиксибит нэһилиэк “Синтай” тараахтарынан наҕараадаланыахтаахтар.
Валентин Барашков, полиция капитана, ыстаарсай участковай боломуочунай:
– Дьиҥинэн, нэһилиэнньэлээх пууннарга киириигэ-тахсыыга видеокамералары туруорууну туруорсубуппут ыраатта. Былырыыҥҥыттан улууспутугар оптоволокно ситимэ киирэн, онно тирэҕирэн, баҕабыт олоххо киирэн эрэр. Билиҥҥитэ улуус киинигэр, Амма сэлиэнньэтигэр, олохтоох дьаһалта баһылыга Михаил Артемьев өйөбүлүнэн 28 видеокамера туруоруллубута. Оттон нэһилиэктэргэ бастакынан Эмискэ икки видеокамераны туруордубут. Сулҕаччылар эмиэ туруортардылар эрээри, кинилэр оптоволокноҕа кыайан холбоммотулар, инньэ гынан тыраассаны көрөр-истэр ис камера буолла.
Редакция
-
0
-
0
-
0
-
0
-
0
-
0
