“Арт-Ажур” куруһуогу Анна Александровна Протодьяконова салайар. Манна уолаттар эрэ буолбакка, кыыс аймах эмиэ сөбүлээн дьарыктанар. Лобзигынан быһан, араастаан оһуордаан-мандардаан, киһи эрэ кэрэхсии көрөр сиэдэрэй оҥоһуктарын чочуйан таһаараллар.

Саха оҕото айылҕаттан тарбаҕар талааннаах, худуоһунньук харахтаах. Онон кылгас кэм иһигэр саҥа ньыманы баһылыы охсон, бэйэлэрэ айан-тутан оҥорор буолаллар.

Саамай үчүгэйэ, “Арт-Ажур” куруһуокка сылдьар оҕолор бизнескэ уһуйуллан саҕалыыллар. Ол курдук, сакааска сувенирдары, араамалары, дьиэ иһин тупсарар, интерьери ситэрэр араас дизайнерскай киэргэллэри оҥорон, ону нэһилиэнньэҕэ атыылаан, бэйэлэрэ тутталларыгар харчылаhaллар. Холобура, кыра оҥоһуктар 350 солкуобайга бараллар. Оттон улахан фотозоналар, аркалар 10 000-ҕа тиийэ сыаналаахтар. Онон оҕолор интэриэстэрэ, айар-тутар баҕалара улахан. Дьон-сэргэ да хамаҕатык үлэһэр, атыылаһар.

Бэйэ оҥоһугун атыылыыр, биллэн турар, оҕоҕо элбэх үөрүйэҕи биэрэр: килийиэн табаарыттан дуоһуйарын курдук кыһаллан үлэлииргэ, бэриллибит болдьоххо бүтэрэр гына түргэн-тарҕан, эппиэтинэстээх буоларга, бириэмэни сатаан тутуһарга, ханнык баҕарар үлэ сыаналаныахтааҕын, харчы сыранан кэлэрин, үлэһит эрэ киһи үчүгэйдик олорор кыахтааҕын өйдүүргэ үөрэтэр.   

--Куруһуокпут “Кэрэли” эбии үөрэхтээһин иһинэн үлэлээбитэ 4-с сыла. Барыта 15 оҕо умсугуйан дьарыктанар. Харантыын да кэмигэр үлэбит тохтообото. Оҕолор Улуу Кыайыы 75 сылынан бэтэрээннэргэ бэлэх быһан бэлэхтээн үөртүлэр, -- диэн кэпсиир Анна Александровна.

“Арт-Ажур” уһуйуллааччыта Эльза Тен:

-- Мин бу куруһуокка сылдьан, элбэххэ үөрэнним. Манна баһылаабыт дьарыгым, сатабылым, ылбыт билиим инники олохпор туһалыа диэн эрэнэбин. Биһиги бу үлэлэрбитинэн  араас быыстапкаларга, бизнес-форумнарга ситиһиилээхтик кыттабыт.

Мария Павлова, Култуура уонна искусство колледжын хореографияҕа салаатын I кууруһун  устудьуона:

 --Мин  VIII-IX кылаастарга “Арт-Ажур” куруһуокка сөбүлээн сылдьыбытым. Үөрэммит сатабылым билигин да тус олохпор олус көмөлөһөр. Ол курдук, ийэбэр араас бэлэхтэри, дьиэбэр сибэкки уурар киэргэллэри оҥорбутум.

Катя Егорова, VII кылаас:

-- Туһалаах куруһуок диэн, ийэм сылдьарга сүбэлээбитэ. Туттар инструменнарбын (лобзик, дрель) дьонум бэлэхтээбиттэрэ.

Мин санаабар, кыргыттар быспыт оһуордара быдан нарын-намчы курдук көстөр. Ол оннугар уолаттар туттуулара түргэн, аҕыйах кэм иһигэр оҥорон бүтэрэллэр. Билигин мин ийэбин кытта беседкабытыгар оһуор быһа сылдьабыт. Ол кэнниттэн сибэккилэрбитигэр араас сиэдэрэй кашполары оҥорор соруктаахпыт.

Лия Колосова, Х кылаас:

--  «Арт-Ажур» куруһуокка 3-с сылбын сылдьабын. Фанераттан араас кэрэ көстүүлээх оҥоһуктары электрическэй лобзигынан быһарга үөрэнним. Урут маннык тэрили уол эрэ сатаан туттар дии саныырым. Ол гынан баран, кыыска да табыгастаах, тутта үөрэннэххинэ, олус судургу эбит.

Үчүгэйдик быһар буолуохпуттан, аны, сакааска үлэлиибин. Бастакы хамнаспын ахсыска үөрэнэ сылдьан ылбытым. Саҥа дьыллааҕы оҥоһуктары атыылаан. Харчы хантан кэлэрин билбитим.

Оскуолабыт ыытар тэрээһиннэригэр оформлениены оҥоробут (фотозоналары, аркалары, о.д.а). Иллэҥ кэммэр дьиэбэр олорон, эмиэ оһуордары, оҥоһуктары быһабын.

Гаджет, Интэриниэт үйэтин ыччата үлэҕэ, уһанарга, айарга-тутарга уһуйар маннык абыраллаах куруһуоктар бааллара олус үчүгэй.  

Аина Охлопкова,

Павловскай, Мэҥэ Хаҥалас.