Бу хоһоонугар хоһуйарын курдук, эбээн буоларынан киэн туттар уонна омуга барҕарарыгар, сайдарыгар бүк эрэнэр хоту дойду хоһуун киһитэ, Саха сирин норуодунай суруйааччыта, судаарыстыбаннай уонна уопсастыбаннай диэйэтэлэ, СӨ Аҕыйах ахсааннаах хотугу норуоттарын ассоциациятын бэрэсидьиэнэ Андрей Васильевич Кривошапкин бүгүн, алтынньы 17 күнүгэр, 80 сааһын туолла.

Биир киһиэхэ элбэх да талаан баар буоларын Андрей Васильевич холобура туоһулуур: айар-суруйар, уустаан-ураннаан кэпсиир, хас да тылы тэҥинэн билэр,салайар-түмэр, норуотун сирдиир, тэрийэр-салайар, уһуйар-үөрэтэр, чинчийэр дьоҕур -- барыта киниэхэ баар. Итинтэн саамай кэрэхсэбиллээҕэ – кини эбээниҥ норуотун туһугар ис сүрэҕиттэн кыһаллара, төрүт дьарыктара, култууралара, тыллара сүппэтин туһугар үтүмэн үлэни ыытара, үрдүк тырыбынаттан туруорсара, сокуонунан көсмүскэһэрэ. 
Андрей Васильевич уһун кэм устата дьокутааттаабыт кэллиэгэбит буолар. Ол курдук, 1990-1993 сс. — РСФСР  уонна Саха АССР норуодунай дьокутаата, РСФСР Үрдүкү Сэбиэтин бастайааннай чилиэнэ, Хотугу сир, Сибиир уонна Уһук Илин аҕыйах ахсааннаах норуоттарын боппуруостарыгар кэмитиэт бэрэссэдээтэлэ. 1994 сылтан — СӨ норуодунай дьокутаата. РФ Федеральнай мунньаҕар Ил Түмэн бастайааннай бэрэстэбиитэлинэн үлэлээбитэ. 2008 сыллаахха Ил Түмэн бэрэссэдээтэлин солбуйааччыта буола сылдьыбыта. 
Кини 1940 сыллаахха Кэбээйи оройуонун Сэбээн Күөлүгэр күн сирин көрбүтэ. 1960-1961 сс. Сэбээн Күөл сэттэ кылаастаах оскуолатыгар учууталлаабыта. Тэрийэр-салайар дьоҕурдаах уолу таба көрөн, 1961-1962 сс. «Кировскай» сопхуос комсомольскай тэрилтэтигэр сэкирэтээринэн анаабыттара. Итинтэн кини салайар үлэтэ саҕаламмыта.

Таас хайа тулалаах, сүүрүктээх үрэхтээх Сэбээнин,  туруу үлэһит табаһыттарын киэн тутта кэпсээри, айымньылары суруйан саҕалыыр. Хаһыакка, сурунаалга1962 сылтан бэчээттэнэр. «Опо» диэн бастакы кинигэтэ эбээн тылынан 1969 сыллаахха тахсыбыта.  «Олени моего детства», «Уйамкане идут на Север» сэһэннэрэ, «Берег судьбы», «Золотой олень» арамааннара ааҕааччы киэҥ сэҥээриитин уонна билиниитин ылбыттара. Айыҥа диэн псевдонимынан биллэр. 1982 сылтан ССРС Суруйааччыларын сойууһун чилиэнэ.
Үөрэххэ-билиигэ баҕалаах эр бэрдэ сайдыан-үүнүөн баҕаран, 1962 с. Ленинградка А.И.Герцен аатынан педагогическай судаарыстыбаннай институкка үөрэнэ барар. Устудьуоннуу сылдьан, 1963-1966 сс. Сэбиэскэй аармыйа кэккэтигэр сулууспалыыр.
Дьиҥнээх патриот буолан, үөрэҕин бүтэрээт, Сэбээн Күөлүгэр төннөн кэлэн, 1970 cылтан орто оскуолаҕа 7 сыл дириэктэрдиир. Тэҥинэн РСФСР Үөрэҕин министиэристибэтин иһинэн үлэлиир научнай-чинчийэр институт Дьокуускайдааҕы филиалыгар младшай научнай сотруднигынан үлэлиир. Онтон сопхуос парткомун сэкирэтээрэ, салайааччыта буолар.
1980 с. Дьокуускайга көһөн кэлэр. 1981 c. -- Саха АССР Миниистирдэрин сэбиэтин инструктора. 1981-1990 сс. — Дьокуускайдааҕы КПСС обкомун отделын сэбиэдиссэйэ.

Онтон сүүрбэттэн тахса сыл дьокутаат буолан, сокуону оҥорсууга үлэлэһэн кэллэ.
Суруйааччы Эрилик Эристиин аатынан уонна Арассыыйа Улахан литературнай бириэмийэлэрин лауреата, СӨ култууратын үтүөлээх үлэһитэ, СӨ Бочуоттаах гражданина Андрей Васильевич Кривошапкин төһө да 80 сааһын туоллар, билигин да айар үлэ үгэнигэр сылдьар, хотугу норуотугар туһуламмыт үлэтин салгыыр.