Балаҕан ыйын 15 күнүгэр “7 континентов” авиа-хампаанньа АН-2 сөмөлүөтүн көтүтүүтэ буолла. Сыала-соруга – АН-2 хайдах үлэлиирин көрдөрүү уонна аччыгый авиацияҕа маннык сөмөлүөттэри туһаныы кыаҕын билиһиннэрии.
Суруналыыстар АН-2 сөмөлүөккэ олорсон, Туймаада хочотун үрдүнэн 10-15 мүнүүтэ көттүлэр, күһүҥҥү айылҕа кэрэ көстүүтүн кэрэхсээтилэр, лүөччүктэр Александр Тарасов уонна Евгений Стасюк сөмөлүөтү хайдах ыыталларын көрдүлэр.
«Бу тэрээһиҥҥэ кыттыыны ылбыккытыгар махтанабын. Ил Түмэн иһинэн оробуочай бөлөх тэриллэн, СӨ бүддьүөтүгэр 2021-2023 сс. уларытыыны киллэрэн, аччыгый авиация сайдыытыгар үп көрүллэрин ситиһиэхтээхпит. Оччоҕо бастакы уочарат бу курдук дьоҕус сөмөлүөттэри атыылаһыы уонна көтөр былаһааккаларын оҥоруу боппуруоһа туруоҕа. Маннык көтөр аалларынан мэдиссиинэҕэ, ыксаллаах быһыыга-майгыга туттуллар таһаҕастары суһаллык тиэйэргэ табыгастаах. Бүгүн эһиэхэ АН-2 диэн туох-ханнык сөмөлүөт буоларын көрдөрөр соруктаах этибит. Эһиги бэйэҕит олорсон, хайдах көтөрүн көрөн, төһөнү сапараапкаланарын билэн, экипаж таһымын сыаналаан, этэргэ дылы, АН-2 аччыгый авиацияҕа олус табыгастаах тырааныспар буоларын бэйэҕит да өйдөөтөххүт. Ол эрээри бу урбаанньыттар биисинэстэрэ буолан, судаарыстыба өттүттэн улахан өйөбүлү ыла илик. Дьиҥэр, аччыгый авиация чааһынайдарынан да сайдара туох куһаҕаннааҕый? Баҕар, сотору кэминэн чугас улуустарга, урукку курдук, салгынынан сырыы баар буолуоҕа дии, холобура, Дьокуускайтан Чурапчыга диэри», - - диэн Павел Петров эттэ.
Бу тэрээһиҥҥэ ДОСААФ бэрэссэдээтэлэ Сергей Соболев, Дьокуускай куорат Думатын дьокутаата Андрей Лебедев, хонтуруоллуур-ааҕар кэмитиэт бэрэссэдээтэлэ Евгений Перфильев, ХИФУ автодорожнай факультетын дассыана Иван Ноев, СӨ Аччыгый авиациятын ассоциациятын бэрэссэдээтэлэ Иван Лукин уонна сөмөлүөт хаһаайына Сергей Баталин кыттыыны ыллылар.
- 0
- 0
- 0
- 0
- 0
- 0