Өрөспүүбүлүкэҕэ бизнес сайдыытыгар билигин болҕомто уурар. Инвестиция тупсарын туһугар дьыала-куолу өттүгэр дойдубут аата-суола ыраас, былаас эйгэтиттэн бизнеска өйөбүл баар буолуоҕун бары билэбит.

Ол эрээри Саха сиригэр киирии хапытаалы туһанарга бу өттүгэр идэлээх маркетинг, иһитиннэрэр-биллэрэр уонна PR үлэ мөлтөхтүк барар. Маны сэргэ бэйэбит ис култуурабыт мөлтөһүөр.

Дьону-сэргэни көрө-истэ, аһата-сиэтэ, көрсө үөрэммэтэхпит. Туристары көрсө, атаара, бэйэбитин үчүгэй өттүнэн көрдөрө хаһан үөрэнэбит?

Ити барыта күннээҕи олохпутугар хайдах тутта-хапта сылдьарбытыттан тахсар, өссө төгүл чопчулуубун, бырааһынньыкка, көстө-биллэ сатааһыҥҥа буолбатах – күннээҕи олоххо. 

Холобур, бэҕэһээ куорат эҥэр баар дьону сынньатар-саататар сиргэ тиийэ сырыттым. Мыраан үрдүгэр олус табыгастаах, кэрэ сиргэ оҥоһуллубут. Оҕо аймах, улахан да киһи дуоһуйа сынньаныан, оонньуох-көрүлүөх, тириитэ тэнийиэх сирэ.

Коронавирус пандемията сатыылаан, киһи элбэҕэ суох. Сынньана таарыйа остуол таһыгар ыскамыайа барыгар олордум. Саҥардыы тыын ылан истэхпинэ (мырааны дабайар манан аҕай дьыала буолбатах), харабыл киһи ойутан кэлэн, дорообото-дыраастыйа суох манна олорор көҥүллэммэт, харчы төлөөн баран биирдэ олороҕут диэтэ. Хонууга олоруохха сөп диэн эбэн эттэ. Хайыахпыный, ойон турдаҕым дии. Сииктээх сиргэ кыратык олоро түһээт, дьиэлииргэ күһэлинним.

Мантан сиэттэрэн, толкуйга түстүм. Сервис, дьоҥҥо-сэргэҕэ сымнаҕас сыһыан биһиэхэ кэлэ илик эбит. Ыалдьыкка бары өттүнэн табыгастаах буоларын тэрийии туризм сайдарыгар оруола муҥура суох диэн өссө төгүл итэҕэйдим.