“Төгүрүк остуол” быһа холбонуу көрүҥүнэн барда. Ол да буоллар, көрсүһүү сүрүн тиэмэтин тула чахчы кэскиллээх, сэргэх кэпсэтии таҕыста. Көрсүһүүгэ норуот дьокутааттара, өрөспүүбүлүкэ толорор былааһын уорганнарын бэрэстэбиитэллэрэ, тыл учуонайдара, култуура үлэһиттэрэ, онтон да атын төрөөбүт тыл дьылҕатыгар ыалдьар, долгуйар дьон кыттыыны ыллылар.

Санатан эттэххэ, 2019 сыл ахсынньы ыйыгар Саха Өрөспүүбүлүкэтин Ил Дархана Айсен Николаев көҕүлээһининэн, 2020-2024 сылларга Саха Өрөспүүбүлүкэтин судаарыстыбаннай уонна официальнай тылларын көмүскүүр уонна сайыннарар тус сыаллаах бырагыраама ылыллыбыта. Ол гынан баран, хомойуох иһин, бырагыраамаҕа күттүөннээх үбүлээһин көрүллүбэккэ, күн бүгүнүгэр диэри “киһилии” үлэлээбэккэ турбута.

“Төгүрүк остуол” үлэтин кэмигэр СӨ Бырабыытылыстыбатын Бэрэссэдээтэлин солбуйааччытын э.т. Сергей Местников үбүлээһин боппуруоһун, дьэ, сиһилии сырдатта. Ол курдук, ааспыт уонна быйылгы сылга судаарыстыбаннай тыллары сайыннарыыга “күлүү гыммыт” курдук 100-түү тыһыынча солк. көрүллэ сылдьыбыт. Аныгы үйэҕэ “сүүс тыһыынча” диэн биир дьыбаан эрэ сыаната буоллаҕа! Оттон өрөспүүбүлүкэ, билэрбит курдук, икки судаарыстыбаннай тыллаах: нуучча уонна саха. Ону таһынан, хотугу аҕыйах ахсааннаах омуктар тыллара – официальнай тылларынан буолаллар. Биллэн турар, ити тыллары барыларын биир таһымҥа тутан бигэтик сайыннарыы элбэх үбү-харчыны эрэйэр. Ол туһунан Сергей Васильевич урулуу түүр тыллаах Татарстан, Башкортостан, Тыва, о.д.а. национальнай өрөспүүбүлүкэлэри холобурдаан туран эттэ. Онон Саха Өрөспүүбүлүкэтин салалтата кэлэр 2021 сылтан тус сыаллаах бырагыраама дьиҥнээхтик олоххо киирэн саҕалыырыгар арыый киһи астынар суумаларын бүддьүөккэ былааннаабыт. Холобур, 2021 сылга – 56 мөл. 600 тыһ. солк, 2022 сылга – 55 мөл. 800 тыһ. солк, 2023 сылга – 55 мөл. 800 тыһ. солк. барылламмыттар.  

Дьиҥинэн, судаарыстыбаннай уонна төрөөбүт тыллар сайдыылара аҥаардас үбүлээһинтэн эрэ тутулуктаммат. Манна социальнай, култуурунай, тэхиньиичэскэй, о.д.а. өрүттээх кыһалҕалар учуоттаныллыахтаахтар. Ол курдук, “төгүрүк остуол” үлэтигэр уопсайа 70-ча киһи араас эйгэттэн кыттыыны ылла. Балар тыл кыһалҕаларын бары өттүттэн ырытан, анаалыстаан көрдүлэр уонна бэйэлэрин кэрэхсэбиллээх санааларын аһаҕастык эттилэр. Ол түмүгэр, судаарыстыбаннай уонна төрөөбүт тыллары сайыннарыыга туһуламмыт биир систиэмэлээх үлэ омооно ойууланна.

“Ил Түмэн” хаһыат аныгыскы 43 №-гэр “төгүрүк остуол” кыттааччыларын санааларын, кыһалҕалары быһаарыыга тус көрүүлэрин туһунан сиһилии ааҕаарыҥ.