Ахсынньы 1 күнүттэн COVID-19 ыарыыны кытта үлэлиир доруобуйа харыстабылын үлэһиттэрэ хамнастара кэмигэр түспэт буоллаҕына, үҥсүүнү госуслуги порталга суруйар кыахтаналлар. Үҥсүү кэннэ тустаах бэрэбиэркэ ыытыллара этиллэр.   

Ахсынньы 3 күнүттэн муусука үстүрүмүөннэригэр анал бэлиэ (марка) туруоруу ирдэниэҕэ. Ол курдук, өскөтүн артыыс кыраныысса таһыгар гостуруолга эбэтэр куонкурска сэдэх үстүрүмүөннээх барар буоллаҕына, үстүрүмүөҥҥэ култуурунай сыаннаһын уонна хаһаайынын туһунан ыйар анал бэлиэни туруорара булгуччулаах буолла.  

Ахсынньы 4 күнүттэн доруобуйаларын туругунан уурайар полиция үлэһиттэригэр уоппуска биэрэр буолуохтара.

Өскөтүн полиция үлэһитэ доруобуйатын туругунан уурайабын диэн сайабылыанньа суруйдаҕына, кинини бастаан уоппускаҕа ыытар уонна ол эрэ кэннэ ууратар буолуохтара. Уоппускатын кэмигэр кинини ууратар көҥүллэммэт. Маннык быраабынан 20-тан тахса сыл ыстаастаах үлэһиттэр туһанар буолуохтара.

Ахсынньы 4 күнүттэн бииргэ төрөөбүттэрин эппэкиин быһыытынан көрөр дьону аармыйаҕа ыҥырбат буолуохтара.

Өскөтүн гражданин бииргэ төрөөбүт балтытын эбэтэр быраатын эппэкиин быһыытынан көрө-истэ сылдьар буоллаҕына, киниэхэ эйэлээх кэмҥэ аармыйаҕа ыҥырыллар болдьоҕун аһатан биэриэхтэрэ.

Ахсынньы 4 күнүттэн колония-бөһүөлэккэ бастакытын сууттаммыт рецидивистэри уонна хайыыга номнуо олоро сылдьыбыт дьону бииргэ хаайар, олордор буолуохтара.

Ахсынньы 4 күнүттэн хаайыыга бэрээдэги кэспит дьон накаастабылын күүһүрдүөхтэрэ, ыстыраабын үрдэтиэхтэрэ.

Ахсынньы 4 күнүттэн хамнас алын кээмэйин туһунан өйдөбүл сорох сокуоннарга ыйыллыбат буолуо. Ол оннугар чопчу сыыппаранан суруллубут хамнас төлөбүрэ суруллуоҕа.

Ахсынньы 14 күнүттэн “больничнайдары” саҥа быраабыланан биэрэр буолуохтара. Саҥа бэрээдэгинэн ыарыһахха бастаан кумааҕыга суруллубут “больничнайы” биэриэхтэрэ, ол кэннэ кини электроннай көрүҥүн уһаттарар кыахтаныаҕа. Хас да үлэҕэ үлэлии сылдьар дьоҥҥо хас да биир нүөмэрдээх лиистэри биэриэхтэрэ.

Ахсынньы 29 күнүттэн “электроннай нотариус” (цифровой нотариат) өҥөтө кэҥиэҕэ. Ол курдук, хас да нотариус кыттыылаах ыраахтан олорон дуогабардары, сөбүлэһиилэри оҥорор кыах үөскүөҕэ.

“Парламентскай хаһыат» матырыйаалынан.