Ким эрэ дьону-сэргэни өйүү, түмэ, сомоҕолуу, көмөлөһө сатыаҕа. Ким эрэ, төттөрүтүн, алдьархайтан ас таһаарынан, бэйэтин туһатыгар уопсастыба өйүн-санаатын булкуйарга дьулуһуо. Бэйэтэ да чэпчэкитэ суох быһыыны-майгыны уустугурда сатыа.
Ити иккис түгэҥҥэ буолбакка, бастакы түгэҥҥэ тохтуом. Биллэрин курдук, коронавирус аан дойдуну бүрүүкээн араас дойдуларга харантыын биллэриллэн, суһал наада тирээтэҕинэ эрэ, дьиэбититтэн-уоппутуттан тахсабыт. Маннык кэмҥэ түөрт эркиҥҥэ хаайтараннар, үгүстэр ыар санааҕа-онооҕо баттаталлар, депрессияҕа киирэллэр.
Коронавирус ордук Италияҕа ыарахан дьайыылаах буолбутун бары билэҕит. Опера ырыаһыта Маурицио Марчини дьонун-сэргэтин сүргэлэрин көтөҕөөрү, балконугар тахсан серенаданы ыллаабыта уос номоҕо буолуон буолла.
Ыраах Турция Анкара куоратыгар олорор саха тылын чинчийээччи Умит Шаһин инстаграмҥа «Бииргэ ыллыахха» диэн бырайыак толкуйдаан, бэйэтин тула үгүс дьону түмтэ. Гитаранан киһи сүрэҕин ортотунан сайан киирэр сахалыы ырыалары толорон, үгүс киһи санаатын көтөхтө. Умит элбэх да ырыаны-тойугу билэриттэн сөхтүбүт эрэ. Кинини кытта тэҥҥэ ыллаһан, муунтуйбут санаабыт сайҕанна. Маннык сырдык, ыраас санаалаах дьон үксүү турдуннар. Итини таһынан бары өттүнэн уустук кэмҥэ бары түмсүүлээх буоларбыт хайаан да наадалаах. Сомоҕолоһуулаах эрэ буоллахпытына, ити аан дойдуну аймаабыт вируһу кыайыахпыт.
- 0
- 0
- 0
- 0
- 0
- 0