Бу манан быһаччы дьарыктанар Уу ресурсаларын федеральнай агентствотын Өлүөнэ сүнньүнээҕи ууга управлениета быйыл кулун тутар 1 күнүттэн, сааскы халаан чугаһаабытынан, бэлэм буолуу эрэсиимин киллэрэн, итиннэ сөптөөх үлэни ыыта олорор. Билигин Өлүөхүмэ уонна Ленскэй улуустарыгар кэккэ сэрэхтээх учаастактарга мууһу кэбирэтии үлэлэрэ бара туралларын туһунан тустаах управление салалтата иһитиннэрэр.  

   «Бу күннэргэ Өлүөнэ уонна Халыма өрүстэр тайаан ааһар Өлүөхүмэ, Орто Халыма, Хаҥалас, Дьокуускай куорат, Ленскэй, Нам, Кэбээйи, Үөһээ Халыма уонна Орто Халыма сирдэригэр-уоттарыгар (ордук нэһилиэнньэлээх пууннар) чуолаан, 39 учаастакка 486 гектар иэннээх сири хараардыы уонна 7 учаастакка 41 км уһуннаах сиргэ мууһу эрбээн кэбирэтии үлэлэрэ ыытыллыахтаахтар. Муус устар 6 күнүнээҕи туругунан Ленскэй, Өлүөхүмэ, Хаҥалас уонна Нам улуустарыгар ити үөһэ этиллибит үлэлэр күүскэ бара тураллар. Нам улууһугар Өлүөнэ өрүскэ 5 км уһуннаах сиргэ мууһу эрбээн кэбирэттилэр. Барыта 17 киһи, 8 массыына, 7 анал тиэхиньикэ үлэлииллэр», – диэн Өлүөнэ сүнньүнээҕи ууга управлениетын салайааччытын э.т. Петр Аргунов кэпсээтэ.  Үөһэ этиллибит 8 улууска мууһу хараардыы үлэлэрэ саҕаланыахтаах этилэр даҕаны күн-дьыл туруга мөлтөҕүнэн сибээстээн, бу күннэргэ тустаах үлэ саҕаланыаҕа.  Бу анал үлэлэр  киин улуустарга кыраапык быһыытынан муус устар 25 күнүгэр, онтон хоту улуустарга ыам ыйын 3 күнүгэр диэри үмүрүтүллүөхтээхтэр.

Дойду үрдүнэн коронавирус дьаҥа туран өрөбүл күннэр биллэриллэннэр гидротехническэй тутуулар, эбийиэктэр туруктарын бэрэбиэркэлээһин бытааран, ити үлэлэр муус устар ортотун эргин ыытыллыахтара. Итини тэҥэ, Өлүөнэ сүнньүнээҕи ууга салалтата биэдимэстибэлэр оробуочай бөлөхтөрүн үлэлэрин  чэрчитинэн, Бүлүүтээҕи уонна Халыматааҕы ГЭС-тэр үлэлиир эрэсиимнэрин хонтуруоллуур. Ол курдук, быйылгы сааскы халаан этэҥҥэ ааһарын инниттэн Бүлүүтээҕи уонна Халыматааҕы ГЭС каскадтарын сааскы халаан иннинээҕи уонна кэннинээҕи үлэлэрин эрэсиимнэрин хонтуруоллуурга аналлаах  мунньах муус устар иккис аҥарыгар быһа сибээс көмөтүнэн ыытыллыаҕа диэн тустаах управление салайааччытын э.т. Петр Аргунов иһитиннэрдэ.