Бэрэсэдьиэн “быһа лииньийэтэ”

Бэс ыйын 30 күнүгэр РФ Бэрэсидьиэнэ В. Путин үгэскэ кубулуйбут “быһа лииньийэтин” тэрийдэ. Дойду баһылыгар олох-дьаһах бары эйгэтигэр сыһыаннаах уопсайа 2,2 мөл. кэриҥэ ыйытыы киирдэ.

Владимир Владимирович: “Алта саастаах оҕолоох ыаллар, өскөтүн оҕолоро быйыл оскуолаҕа барбат да буоллаҕына, эмиэ биир кэмнээх төлөбүрү ылыахтаахтар. Мин этиибин бырабыыталыстыба истиэ дии саныыбын”, – диэн чопчулаата. Онон балаҕан ыйын 1 күнүгэр диэри алталаах уонна онтон үөһэ саастаах оскуолаҕа үөрэнэр оҕолоох ыаллар 10 000 солк. биир кэмнээх төлөбүрү ылыахтара.

“Ил Дарханныын кэпсэтии”

“Саха” НКИХ “Ил Дарханныын кэпсэтии” диэн биэриитигэр Айсен Николаев: “Ойуур баһаардарын кытта охсуһууга саҥа технологиялары туттуохпутун наада”, – диэн эттэ. Ол курдук, Лесавиаохрана тэрилтэ үлэтин тупсарар сорук турбут.

– Биһиги ойуур баһаардарыгар сып-сап быһаарыныылары ылынарбытыгар саҥа технологиялары уонна аныгы оборудованиены туттуохпутун наада, – диэн бэлиэтээтэ. Онон бу ыйдарга боппуруоһу быһаарыыга тустаах миэрэлэр ылынылаллара күүтүллэр.

Саҥа спикер

Ил Түмэн VI Ыҥырыылаах Мунньаҕын Бэрэссэдээтэлинэн Алексей Еремеев талылынна. Алексей Ильич кандидатуратын парламент XXIX уочараттаах пленарнай мунньаҕар “Биир ньыгыл Арассыыйа” бэлитиичэскэй баартыйа фракцията киллэрэн мэктиэлээтэ. Атын фракциялар бары хандьыдааты өйөөтүлэр.

Ааҕар-суоттуур палаата бэрэссэдээтэлэ Андрей Николаев кистэлэҥ куоластааһын түмүктэрин таһаарда. Онно Алексей Еремеевы мунньахха олорбут 58 дьокутааттан 57 киһи өйөөбүт, биир дьокутаат утарбыт. Онон баһыйар куолаһынан кыайан, хандьыдаат спикер мандаатын ылла.

Бэчээт күнэ

От ыйын 1 күнүгэр Саха сиринээҕи Бэчээт күнэ бэлиэтэннэ. Бу күн үтүө үгэһинэн, Ил Түмэн дьиэтин иннигэр, В.В. Никифоров-Күлүмнүүр пааматынньыгар сибэкки дьөрбөтүн уурдулар.

Бэлиэ түгэҥҥэ Ил Дархан Айсен Николаев уонна Ил Түмэн спикерэ Алексей Еремеев кытыннылар. Бэчээт дьиэтигэр иһитиннэриилэри киэҥник тарҕатар сириэстибэлэр бастыҥ үлэһиттэригэр судаарыстыбаннай наҕараадалары туттардылар.

Саҥа босуобуйалар

От ыйын 1 күнүттэн Саха сиринээҕи Биэнсийэ пуондата саҥа босуобуйаларга сайабылыанньалары хомуйууну саҕалаата.

Ол курдук, эрдэ учуокка турбут оҕо күүтэ сылдьар дьахталлар уонна 8-тан 17-гэр диэри саастаах оҕолоох ситэтэ суох дьиэ кэргэттэр ый аайы социальнай босуобуйа ылар кыахтаннылар. Сайабылыанньаны судаарыстыбаннай өҥөлөр порталларыгар уонна Биэнсийэ пуондатын салааларыгар тиийэн суруйуохха сөп. Биэнсийэ пуондатыгар 8-800-600-02-98 нүөмэринэн эрийэн, эрдэттэн болдьоһон тиийэллэр.

Бэрдьигэстээххэ саҥа күргэ

XXI Манчаары оонньууларын көрсө, Бэрдьигэстээххэ Матта үрэҕи туоруур саҥа күргэ тутулунна. Бу бырайыагы “Саха Өрөспүүбүлүкэтигэр табыгастаах куорат эйгэтин тэрийии” диэн бырагырааманан олоххо киллэрдилэр. Тутууну Петр Архипов салалталаах “Томтор” хампаанньа үлэҕэ киллэрдэ.

Күргэ үөрүүлээх аһыллыытыгар СӨ бэрэссэдээтэлин солбуйааччы, Манчаары оонньууларын тэрийэр хамыыһыйатын бэрэссэдээтэлэ Сергей Местников кытынна. Санаттахха, Бэрдьигэстээх сэлиэнньэтигэр анаан туспа дизайн-куод оҥоһуллубута. Онно олоҕуран номнуо хас да эбийиэк тутулунна. Манчаары оонньуулара от ыйын 7 күнүттэн саҕаланаллар.

Ас-үөл киинэ

Өлүөхүмэҕэ “Diamond” диэн Саха сирин омуктарын төрүт аһын-үөлүн киинэ аһылынна. Кыһыл лиэнтэни куорат баһылыга Альбина Масина уонна урбаанньыт Тигран Варданян быстылар.

Киин үлэтин бастакы күнүгэр элбэх киһи тоҕуоруста. Өлүөхүмэ олохтоохторо араас омуктар куухуналарын бастыҥ бүлүүдэлэрин амсайдылар.

Интэриниэт хаартыскалара.