Сарсыарда 10 чааска дьокутаат көмөтүгэр наадыйыан баҕарар кыһалҕалаах дьон муһунна. “Биир ньыгыл Арассыыйа” баартыйа бэрэссэдээтэлин уопсастыбаннай приёмнайыгар эрдэттэн суруттаран бэлиэтэммиттэр. Көрсүһүү үс чаас устата барда. Дьокуускай араас түөлбэтиттэн уопсайа сүүрбэччэ киһи кэлэн кыһалҕаларын этиннилэр.

Набережнай уокурук дьокутаата тэрийбит көрсүһүүтэ атыттартан уратылаах буолла. Ханнык салааҕа элбэх ыйытыы киирбитинэн көрөн куорат дьаһалтатыттан бэрэстэбиитэллэри ыҥыран кытыннарда. Дьокутаат Мария Христофорованы сэргэ Дьокуускай куорат дьаһалтатын дьиэ кэргэн дьыалатыгар салаатын начаалынньыгын эбээһинэһин толорооччу Гарри Евдокимов, дьиэ-уот сыһыаннаһыытын дэпэртээмэнин хаарбах дьиэттэн көһүү салаатын начаалынньыгын солбуйааччы Вадим Семенов уонна юрист Дьулустаан Григорьев кэлбит дьон ыйытыыларыгар хоруйдаатылар, сүбэ-ама биэрдилэр.

Набережнай уокурук олохтоохторо эрэ буолбакка, куорат араас түөлбэтиттэн кэлэннэр кыһалҕаларын этиннилэр. Сааска хааччах суох буолла: эдэрдэр да, саастаахтар да тэҥинэн кэллилэр. Ордук элбэх ыйытыы социальнай көмөҕө, чуолаан эттэххэ, 3 саастарыттан 7-гэр диэри саастаах оҕолорго көрүллэр босуобуйаҕа, хаарбах туруктаах дьиэттэн көһүүгэ, уһуйааҥҥа миэстэ булууга, инбэлииттэргэ, кыаллыбат дьоҥҥо көмө төлөбүр көрүллүүтүгэр уо.д.а. киирдэ.

Холобур, Үөһээ Дьааҥы Баатаҕайыттан төрүттээх, улаатан эрэр икки уол оҕолоох соҕотох ийэ маннык кыһалҕалаах. Кэргэнин кытта суутунан арахсыбыт. Уолаттар аҕалара алимент харчытын сүгүн-саҕын төлөөбөт, ийэ оҕолорун соҕотоҕун иитэр эбит. Аны туран арахсыбыт кэргэнин кирэдьиитигэр “созаёмщик” буолан, иэс бөҕөҕө ыйанан хаалбыт. Суут бириистэптэр соҕотох ийэ хамнаһыттан уста тураллар. Ыал кыра оҕото быйыл оскуолаҕа киирэринэн сибээстээн соҕотох ийэ дьиэ өрөмүөнүгэр көмө харчы көрдөһөр.

Иккис түгэн. Ийэтэ, эбэтэ аһыы утахха ылларбыт эдэр кыыс маннык кэпсиир. “Ийэм, эбэм арыгы дьаатыгар ылларбыттара  ыраатта. Араастаан көмөлөһө, дьэбэрэттэн таһаара сатаатым да, кыайбатым. Эбэм кыбартыыралаах, ол докумуона сүппүтэ. Докумуон дубликатын көрдүү, саҥаны оҥотторо сатаатым да, кыаллыбата. Кыбартыыраҕа туох да сыһыана суох буолан тахсабыт. Туох эмэ буолан хаалар түгэнигэр сударыыстыба бас билиитигэр барар” диэн эдэр кыыс долгуйарын биллэрэр.

Ыйытыы социальнай көмө, дьиэ-уот боппуруоһун тула эрэ барбата. Инбэлиит уол оҕолоох ийэ кэлэн санаатын этиннэ. Уола муос оҥоһугу өрөмүөннээһининэн дьарыгырар эбит. Саха сиригэр төрүт үгэһи, култуура атын салааларын сайыннарарга тустаах болҕомто ууруллар эбит буоллаҕына, муос оҥоһуктары киэҥ эйгэҕэ таһаарарга, сайыннарарга сөптөөх үлэ ыытыллыбатыттан хомойор. Бу эйгэҕэ болҕомтону ууран үлэлэр киэҥ эйгэҕэ тахсалларыгар көмө көрдүүр.

Көрсүһүүгэ Губинскай уокурук биллэр уопсастыбанньыга Наталья Сивцева кытынна. Наталья ыарахан балаһыанньаҕа түбэспит, инбэлиит оҕолоох, кыаллыбат 68 дьиэ кэргэҥҥэ көмөлөһөр. Кини туруорсуутунан элбэх ыал көмөнү ылары ситиспит. Бу да көрсүһүүгэ уустук балаһыанньалаах хас да ыалы аҕалан дьокутаакка кыһалҕаларын эттилэр.   

Дьокутаат мустубут кыһалҕалаах дьон хас биирдиилэрэ сайабылыанньа суруйан хаалларалларыгар соруйда. Инньэ гынан олохтоохтор кыһалҕалара биир көрсүһүүнэн, “ыйытыы-хоруй” таһымынан эрэ муҥурдаммата. Дьүүллэһии, туруорсуу үлэтэ салгыы барар.