Саха сиринээҕи суһал ыстаап салайааччытын солбуйааччы Ольга Балабкина иһитиннэрбитинэн,  Алдаҥҥа 14, Нерюнгригэ 9, Мэҥэ Хаҥаласка  8, Мииринэйгэ 7 киһи, итини тэҥэ, 21 улууска 2-6-лыы киһи хамсык дьаҥар хаптарбыт. Бу күннэргэ өрөспүүбүлүкэ бары улуустарыгар баар суһал ыстааптар сүрүн сыалларынан-соруктарынан  Саҥа дьыллааҕы тэрээһиннэргэ дьон күргүөмүнэн  мустубаттарыгар үлэни ыыталлар уонна социальнай хабааннааах тэрилтэлэргэ (оҕо саадыгар, оскуолаҕа, култуура, сынньалаҥ кииннэригэр)  бырааһынньыгы хааччахтаныы эрэсииминэн ыытарга үлэни бэлэмнииллэр.  Итини тэҥэ, суһал ыстаап бүгүҥҥү мунньаҕар  Саҥа дьыллааҕы уһун өрөбүллэргэ улуустарга аймахтарыгар күүлэйдии тиийэр оҕолор олохтоох педиатр, миэдиктэр быһаччы хонтуруолларыгар киириэхтээхтэрин туһунан эттилэр. Бу хамсык кэмигэр ыраах айаннаабатах быдан ордуга буолуо. Чугас дьоммутун харыстыах тустаахпыт.