Үтүөрэн да баран, бу уодаһыннаах ыарыы атын уоргаҥҥа охсон, онтон өлүү эмиэ элбэҕин бары билэ-көрө сылдьабыт.

Ол иһин билигин өрөспүүбүлүкэбитигэр баар “Спутник-лайт” уонна “ЭпиВакКорона”  быһыылары ыла охсоргут ордук. Вакцина аата вакцина, үйэ саас араас сыстыганнаах ыарыыттан харыстаан, көмүскээн кэлбитэ. Билиҥҥи туругунан нэһилиэнньэ 89%-на быһыы бастакы компоненын ылбыт -- 305 870  киһи. Уопсайа 381 995 доза вакцина өрөспүүбүлүкэҕэ кэлбит.

Өрөспүүбүлүкэтээҕи суһал ыстаап атырдьах ыйын 24 күнүгэр иһитиннэрбитинэн, ааспыт сууккаҕа 142 киһи сутуллубут.

 — Дьокуускайга – 80;

— Мииринэйгэ– 11;

— Сунтаарга, Хаҥаласка — 6-лыы;

 — Алдаҥҥа – 5;

— Муомаҕа – 4;

— Намҥа, Өймөкөөҥҥө, Орто Халымаҕа, Уус Алдаҥҥа — 3-түү;

 — Тааттаҕа, Чурапчыга — 2-лии;

— Аммаҕа, Үөһээ Бүлүүгэ, Бүлүүгэ, Горнайга, Эдьигээҥҥэ, Кэбээйигэ, Мэҥэ Хаҥаласка, Нерюнгрига, Ньурбаҕа, Өлүөхүмэҕэ, Өлөөҥҥө, Томпоҕо, Уус Маайаҕа, Эбээн Бытантайга биирдии киһи ыарыйда.

СӨ Доруобуйа харыстабылын миниистирэ Елена Борисова бэҕэһээҥҥи брифинигэр: “Ыарахан туруктаах ыарыһах элбэх”, — диир. Онон куойка ахсаанын элбэтэргэ үлэ барар. Билигин 1000 кэриҥэ куойка миэстэ баар, ол тиийбэт.

Оҕолор ыалдьаллара үксээбит. 1000-тан тахса оҕо балыыһаҕа сытар, амбулаторнай хонтуруолга баар. Миниистир оҕолору вакциналааһын саҕалана илигин санатта уонна: “Ол иһин оҕолору кытта алтыһар дьон харыстабыллаах буолуҥ”, — диэн ыҥырда. Манна даҕатан эттэххэ, оҕолорго аналлаах вакцинаны таһаараары сылдьаллар эбит. Оттон үөрэх дьыла саҕаланна да, грипп быһыытын үөрэнээччилэргэ биэриэхтэрэ.