Саҥа эрэсиим уратылара
Бастакы түһүмэҕинэн, алтынньы 20 күнүттэн, QR-код эрэсиимэ култуура тэрилтэлэригэр киирэргэ олохтонно: тыйаатырдарга, кэнсиэртиир тэрилтэлэргэ, киинэ тыйаатырдарыгар, түмэллэргэ, бибилэтиэкэлэргэ, быыстапкаларга, култуура дьиэлэригэр, култуурунай-сынньалаҥ кииннэргэ, айар устуудьуйаларга.
Иккис түһүмэҕинэн, алтынньы 25 күнүттэн, фитнес-кулууптарга уонна эти-хааны дьэбдигирдэр, эрчийэр саалаларга,бассейннарга, спорт саалаларыгар, сабыылаах манежтарга, хайыһар баазаларыгар, сабыылаах хаҥкылыыр эбийиэктэргэ, спортивнай-сынньалаҥ тэрилтэлэргэ, Бүтүн Арассыыйатааҕы «Үлэҕэ уонна оборуонаҕа» физкултуурунай- чэбдигирдэр комплекстар кииннэригэр киирэр.
Үһүс түһүмэҕинэн, сэтинньи 1 күнүттэн, рестораннарга, кафеларга, остолобуойдарга, банкеттыыр саалаларга үлэлиэҕэ.
Ыйыллыбыт тэрилтэлэргэ киирэргэ, булгуччу, гражданнар COVID- 19 утары быһыыны ылбытын, эбэтэр ыарыы кэннэ үтүөрбүтүн туоһулуур сертификаттары көрдөрүөхтээхтэр. Сертификаттар «Госуслуга» порталынан QR-кодунан бигэргэммит буолуохтаах, ону тэҥэ киһини туоһулуур докумуона ирдэнэр. QR-коду кумааҕыга бэчээттээн эбэтэр смартфоҥҥа хачайдаан тустаах үлэһиккэ көрдөрүөххэ сөп.
Вакцинациялааһыны көҕүлээһин
Ыган-түүрэн Саха сиригэр саҥа эрэсиимҥэ киирии, дьоҥҥо-сэргэҕэ хоруона ыарыыта тарҕаныыта үрдээбититтэн үөскээтэ. #СтопКоронавирусЯкутия статистиката көрдөрөрүнэн, кэнники күннэргэ күн аайы 280 тахса киһи ыалдьар. Балаһыанньа уустугун өйдөөннөр, дойду Бырабыыталыстыбатыгар саҥаттан-саҥа көдьүүстээх дьаһаллары ылыналлар. Холобур, алтынньы 12 күнүгэр, коронавирус ыарыытын тарҕаныытын утары ситиһиилээхтик охсуһар эрэгийиэннэрэ доруобуйа харыстабылын тиһигин сайыннарыыга анал граннары ылыахтара. Гран харчытын түҥэтии быраабылатын туһунан Уурааҕы РФ Бырабыыталыстыбатын бэрэссэдээтэлэ Михаил Мишустин бигэргэттэ. Түҥэтиллэр харчы «бириискэ пуондаттан» суумата кырата суох 5 млрд. солк. Бастыҥ эрэгийиэннэри куонкурус түмүгүнэн быһаарыахтара, оттон бириискэ тиксэр кыайыылаахтар ахсааннара уонна кээмэйэ хоруона дьаҥын утары федеральнай Суһал ыстааба быһаарыаҕа. Куонкурус сэтинньи ыйга ыытыллара былааннанар.
Маны таһынан, Бэрэсидьиэн Владимир Путин этиитинэн, алтынньы 30 күнүттэн сэтинньи 7 күнүгэр диэри, дойду үрдүнэн эбии сынньалаҥ күннэринэн биллэрилиннилэр. Бу күннэргэ үлэһиттэр хамнастара толору харыстанара мэктиэлэннэ. Итини таһынан, эрэгийэннэринэн хоруона дьаҥын утары охсуһууга алтынньы 23 күнүттэн биитэр алтынньы 7 күнүттэн салгыы эбии сынньалаҥ күннэри олохтуурга эрэгийиэннэр баһылыктарыгар быраап биэрэри сорудахтаата.
Хонтуруол күүһүрэр
Ким эрэ QR-код эрэсиимэ киирбиттэн үөрэр, ким эрэ хоһоон суруйар, ким эрэ оонньуу оҥостор. Сорох дьон үрдүкү салалта дьаһалларыгар саарбаҕалыыр курдук сыһыаннаһаллар,бу иннинэ уопсастыбаннай тэрилтэлэргэ киириигэ мааскалаах буолууну «хонтуруоллуур» үлэ барар эбит буоллаҕына, «саҥа киирбит эрэсиими ким да билиэн суоҕун сөп» диэн саарбахтыыллар. Эбиитин «QR-коду чэпчэкитик атыылыыбыт», таҥнарытын «QR-коду ылар кыахпыт суох!» диэн бассаапка араас биллэриилэр, үҥсээччилэр этиниилэрэ үксүүр. Холобур, бырааска тиийбэккэ эрэ саҥардыы үтүөрбүт дьон ахсаана элбэх.
Санаттахха, бу нэдиэлэҕэ федеральнай Суһал ыстаабын мунньаҕар РФ Вице-премьера Татьяна Голикова дойду үрдүнэн QR-код быраактыкатын тарҕатар туһунан боппуруоһу көрөргө этии киллэрбитэ. Номнуо 50 эрэгийиэн салалтата саҥа эрэсиими олоххо киллэрбитин, атыттар бэлэмнэнии үлэтин ыыталларын туһунан иһитиннэрдилэр. Бу нэдиэлэттэн QR-код эрэгийиэннэринэн киирдэ: Тула, Саратов, Волгоград, Воронеж, Карелия, Свердлов, Псков уобаластарыгар, ону тэҥэ Ямало- Ненецкэй уонна Ханты- Мансийскай аптаныамыйалаах уокуруктарга уонна Саха сиригэр. Оттон сэтинньи 1 күнүттэн Омскай, Тамбовскай уобаластарга уонна Санкт-Петербург уопсастыбаннай тэрилтэлэригэр киирэргэ булгуччу QR-код ирдэниэҕэ.
Оттон өрөспүүбүлүкэ атыы-эргиэн, сынньалаҥ кииннэригэр COVID-19 ыарыы тарҕаныытын утары дьаһаллары тутуһууну хонтуруоллааһын күүһүрэр. Атыы-эргиэн бэрэстэбиитэллэрэ, социальнай ситимнэр нөҥүө, тустаах дьаһаллар ирдэбиллэрин тутуһалларыгар көрдөһөллөр. Холобур, «Аквариум», «Дэлэй», «Айсберг» уонна «Туймаада» атыы-эргиэн кииннэрин дьаһалталара киин куорат олохтоохторугар уонна ыалдьыттарыгар ыйыллыбыт быраабылалары тутуһалларыгар ыҥыраллар. Манна даҕатан, атыы-эргиэн кииннэрин «хонтуруоллуур пуостарга» ыалдьыт температурата кээмэйдэнэр уонна мааскалаахтара бэрэбиэркэлэнэр», – диэн тоһоҕолоон бэлиэтиир СӨ Урбааҥҥа, атыыга-эргиэҥҥэ уонна туризмҥа миниистирин солбуйааччыта Максим Прокопьев.
- 0
- 0
- 0
- 0
- 0
- 0