Павел Пинигин 1953 сыллаахха кулун тутар 12 күнүгэр Чурапчы улууһун Дириҥ нэһилиэгэр төрөөбүтэ. 1964 сылтан көҥүл тустуунан утумнаахтык дьарыктаммыта. 1966 сылтан биллиилээх тириэньэргэ Дмитрий Коркиҥҥа эрчиллибитэ.
1975 сыллаахха Киевтааҕы судаарыстыбаннай физическай култуура институтун уонна Арассыыйа Ис дьыалаҕа министиэристибэтин салалтатын академиятын бүтэрбитэ.
1975-1987 сс. – Аармыйа кэккэтигэр сулууспалыыр.
1987-2009 сс. – Саха Өрөспүүбүлүкэтин ис дьыалаҕа уорганнарыгар үлэлиир.
2009-2010 сс. – Саха Өрөспүүбүлүкэтин бэрэсэдьиэнин сүбэһитэ.
2010-2011 сс. – Саха Өрөспүүбүлүкэтин физическай култуураҕа уонна спортка судаарыстыбаннай кэмитиэтин бэрэссэдээтэлин солбуйааччы.
2013 сылтан СӨ “Спортивнай маастарыстыбатын үрдүкү оскуолатын” дириэктэрин бастакы солбуйааччы.
Павел Павлович СӨ Ил Түмэн V, VI ыҥырыылаах мунньахтарын дьокутаата. Норуот дьокутаатын быһыытынан 2019 сылга “Хотугу аҕыйах ахсааннаах норуоттар правовой статустарын” туһунан сокуоҥҥа уларытыылары киллэрэр сокуон барылын, “Дьүкээгир норуотун Суктулун” туһунан сокуоҥҥа уларытыылары киллэрэр сокуон барылын, “Саха Өрөспүүбүлүкэтин судаарыстыбаннай уорганнарын правовой аакталарын” туһунан сокуоҥҥа уларытыылары киллэрэр сокуон барылын көҕүлээбитэ. Оттон 2020 сылга “Дьүкээгир норуотун Суктулун” туһунан сокуоҥҥа эбии көннөрүү киллэртэрбитэ.
Павел Пинигин аатынан Нерюнгри улууһугар көмүстээх сир, 63,37 караттаах алмаас уонна астероид ааттаммыттара.
Кини “Путь к Олимпу” (1984 с.) уонна “Дело моей жизни – борьба” (1990 с.) диэн кинигэлэр ааптардара.
“Ил Түмэн” издательскай дьиэ саха саарынын, өрөспүүбүлүкэ ытык киһитин Павел Павлович Пинигины төрөөбүт күнүнэн истиҥник эҕэрдэлиир уонна дьолу-соргуну, чэгиэн доруобуйаны, тахсыылаах үлэни-хамнаһы баҕарар.
Бэйэҕит эҕэрдэлэргитин кэмэнтээрийдэргэ суруйан хаалларыаххытын сөп.
-
0
-
0
-
0
-
0
-
0
-
0
