Бэс ыйын 29-30 күннэригэр боруобалыыр биир кэлим эксээмэннэр буолбуттара. От ыйын 3 күнүгэр  литература, география, информатика уонна ИКТ предметтэригэр бастакы БКЭ ыытылынна. От ыйын 6-7 күннэригэр нуучча тылыгар эксээмэн буолан ааста.

От ыйын 10 күнүгэр математикаҕа, от ыйын 13 күнүгэр историяҕа уонна физикаҕа, от ыйын 16 күнүгэр обществознаниеҕа уонна химияҕа, от ыйын 20 күнүгэр биологияҕа  буолуохтара. Ону кытта от ыйын 20 күнүгэр омук тылыгар суругунан эксээмэни, от ыйын 22-23 күннэригэр омук тылыгар тылынан эксээмэни туттарыахтара. Резервнэй эксээмэннэр от ыйын 24-25 күннэригэр ыытыллаллара былааннанар.

Быйыл пандемиянан эксээмэни тутар пууннарга ураты ирдэбил олохтонно. Эксээмэн ыытыллар аудиториялара дезинфекцияны ааһыахтаахтар, бактериялары өлөрөр анал рециркулятордар туруоруллуохтаахтар. Эксээмэни туттарааччылар бэйэ-бэйэлэриттэн 1,5 миэтэрэ тэйиччи олороллорун курдук сурааһын тардыллыахтаах, аудиторияҕа киирээччилэр температураларын кээмэйдиир термометрынан, сараасаны утары сириэстибэлэринэн хааччыллыахтаахтар.  СӨ үөрэххэ уонна наукаҕа миниистирэ Михаил Сивцев бэс ыйын 29 күнүгэр Дьокуускай куоракка эксээмэни тутар пууннар бэлэмнэрин көрбүтэ-истибитэ. Маны таһынан бэс ыйын 23 күнүттэн эксээмэни тутар пууннар бэрэбиэркэни ааспыттара. Бэс ыйын 29 күнүгэр боруобалыыр биир кэлим эксээмэҥҥэ 198 пуун үлэлээбитэ. Бу бэрэбиэркэлэр түмүктэринэн эксээмэни тутар пууннар Роспотребнадзор туруорбут ирдэбилигэр сөп түбэһэллэрэ быһаарыллыбыт. Санатар буоллахха, быйыл өрөспүүбүлүкэ үрдүнэн эксээмэни тутар 201 пуун үлэлиир.

От ыйын 3 күнүгэр литература, география, информатика уонна ИКТ предметтэригэр эксээмэни уопсайа 1978 оҕо туттарбыт. Дьокуускай куоракка 9 пуун үлэлээбит. Литература предметигэр 308 выпускник, информатикаҕа 470 оҕо, географияҕа 46 выпускник туттарбыттар.  От ыйын 6-7 күннэригэр нуучча тылыгар  ыытыллыбыт эксээмэҥҥэ уопсайа 5707 выпускник   кыттыбыт.

От ыйын 10 күнүгэр сүрүн математикаҕа эксээмэни 3151 оҕо туттарбыт. Санатар буоллахха, быйыл базовай математикаҕа эксээмэн ыытыллыбат.

Биһиги биир кэлим эксээмэннэр хайдах ааһан эрэллэрин туһунан тэрийээччилэртэн ыйыталастыбыт.

Өрөспүүбүлүкэ биир киэн туттар оскуолатыгар

Дианна Сивцева, Өрөспүүбүлүкэтээҕи лицей-интернат үөрэҕи тэрийиигэ дириэктэри солбуйааччы:

--Өрөспүүбүлүкэтээҕи лицей-интернат алта кылааһы таһаарда, уопсайа 140 оҕо бүтэрдэ. Пандемия саҕаламмытын кэннэ улуустан сылдьар сорох оҕолор дьиэлэриттэн, сорохторо куоракка аймахтарыгар олорон дистанционнай ньыманан үөрэммиттэрэ. Ол курдук, быйыл бүтэрэр 88 оҕо куоракка хаалбыта, 52 оҕо улууска барбыттара. Оҕолор дистанционнай ньыманан консультацияларын толору ылбыттара, ыла да сылдьаллар. Эксээмэни бэйэбит оскуолабыт иһинэн тэриллибит пууҥҥа тутабыт. Эпидемиологическай бары ирдэбили тутуһан ыытабыт. Аудиторияҕа икки киирэр сири оҥордубут, бэйэ-бэйэлэриттэн тэйиччи сылдьалларыгар муостаҕа сурааһын тардыбыппыт. От ыйын 3 күнүгэр биһиги оҕолорбут информатика уонна литература предметтэригэр туттардылар. Географияны туттарар оҕо суох. Ордук информатиканы элбэх оҕо талла, 41 оҕо туттарда. Оҕолору температураларын кэмнээбиппит, бары биирдэ кэлэн тоҕуоруспаттарын курдук туттарар бириэмэлэрин болдьообуппут. Сараасаны өлөрөр анал оборудование турар, дезинфекциялыыр сириэстибэлэри туһанныбыт.

От ыйын 6 күнүгэр нуучча тылын 91 оҕо туттарда. От ыйын 10 күнүгэр профильнай математика предметин 66  выпускникпыт уонна  урут бүтэрбит 4 киһи кэлэн туттардылар. От ыйын 13 күнүгэр физиканы 39 оҕо,  историяны 10 выпускник туттарыаҕа.

Эдьигээннэр үрдүк бэлэмнээх көрүстүлэр

Антонина Яковлева, Эдьигээн оройуонун үөрэххэ управлениетын начаалынньыга:

--Быйыл уопсайа 39 оҕо оскуоланы бүтэрбититтэн, 16-та үрдүк үөрэххэ киирэр баҕалаах буолан, БКЭ-ни туттарыаҕа. Олохтоох бүддьүөттэн үп көрөннөр ыарыы тарҕаныытын утары араас оборудование, дезинфекция сириэстибэлэрэ, мааска, бэрчээккэ, термометр атыыласпыппыт. Бу үп толуйулларыгар эрэллээхпит. Эксээмэни тутар пуун Эдьигээн орто оскуолатыгар баар. Ирдэнэр бары үлэ ыытыллыбыта. Бэс ыйыгар пуун төһө бэлэмин оройуон баһылыга Алексей Егорович Мандаров салайааччылаах биэдэмэстибэлэр икки ардыларынааҕы хамыыһыйа кэлэн бэрэбиэркэлээбитэ.

Пандемия туруоҕуттан дистанционнай үөрэх саҕаламмыта. Биһиги улууспутугар интэриниэт олус мөлтөх. Ол иһин баһылык Алексей Егорович Мандаров өйөөн, улуус иһинэн 11 антенналаах локальнай интэриниэт ситимин туруордубут. Бу ситиминэн оскуола үөрэнээччилэрэ, үөрэх тэрилтэтин үлэһиттэрэ туһаналлар. Ситиммитин “Алагун” диэн ааттаабыппыт, эбэҥки тылыттан “Үөрэх” диэн тылбаастанар. Бу ситим иһинэн абитуриеннар штабтара үлэлиэҕэ.

От ыйыгар хас биирдии предметкэ иккилии выпускник эксээмэн туттарбыта. Нуучча тылын 16 бэйэбит выпускникпыт уонна Өрөспүүбүлүкэтээҕи лицей-интернаттан уонна арктическай оскуолаттан кэлбит икки оҕо туттарда. Оҕолор үлэлэрин сканердаан ыытарбытыгар эмиэ интэриниэт мөлтөҕүттэн уустуктары көрсүбүппүт. Биһиги үөрэх миниистирэ Михаил Сивцевкэ  кыһалҕабытын эппиппитигэр, тута көмөлөспүтэ. «Ростелеком” үлэһиттэрэ кэлэн, анал тарыып холбоон  биэрбиттэригэр, докумуоннарбыт түргэнник бардылар.