Биһиги Уу ресурсаларын федеральнай управлениетын Өлүөнэ сүнньүнээҕи (тардыытынааҕы) ууга салалтатын ууга хаһаайыстыбатын отделын начальнига Николай Портнягиҥҥа тахсан, өрүстэр муустара хайдах эстэн эрэллэрин уонна сааскы халаан уутун хонтуруоллааһыҥҥа ханнык үлэлэр ыыталларын ыйыттыбыт.

-- Быйыл Саха сиригэр Өлүөнэ өрүскэ муус хамсааһына муус устар 27 күнүгэр саҕаламмыта. Өрүс аһыллыыта нуорматтан 14-15 күнүнэн эрдэлээтэ. Иркутскай уобаласка муус устарга халлаан олус сылыйан, биһиэхэ нуорматтан эрдэ өрүс мууһа хамсаата.

Ол курдук, билгэлээһининэн, Ленскэй куоракка ыам ыйын 1-2 күннэригэр муус устарын күүтэбит. Билиҥҥи туругунан Өлүөнэ өрүскэ Өлүөхүмэҕэ диэри уу таһыма үрдүү турар, кыһыҥҥы таһымтан 1-1,5 миэтэрэҕэ диэри үрдээтэ. Тээнэ өрүс муус устар 27 күнүгэр хамсаабыта. Өрүс мууһа устан, уутун таһыма кыччыы турар. Саха сирин киин оройуоннарыгар өрүстэр муустара кэбирииллэр, ырбыылар үөскүүллэр, ууларын таһыма үрдүү турар. Хоту өрүстэр, Дьааҥы, Индигиир, Халыма, кыһыҥҥынан тураллар, хамсыы иликтэр. Урукку сыллар курдук, быйыл эмиэ муус харар сирдэрэ бааллар. Ол курдук, Ленскэй оройуонун Батамай, Өлүөхүмэ оройуонун Кыыллаах Арыы сэлиэнньэлэрин аттыгар уонна Өлүөхүмэ өрүс Өлүөнэ өрүскэ түһэр сирдэрэ кутталлаахтар. Ону таһынан Дьокуускай куорат уонна Нам таһыгар сылын аайы харыылар үөскүүллэр. Ол эрээри бу сирдэргэ харыылар үөскээһиннэрэ халлаан туругуттан тутулуктаах буолуоҕа. Ити харыы үөскүүр сирдэригэр бу ыйга мууһу хараардыы уонна эрбээһин үлэтин ыыппыппыт. Федеральнай бүддьүөттэн Алдан, Амма, Токко, Өлүөнэ, Халыма өрүстэргэ хараардыы уонна эрбээһин оҥоһуллубута. Барыта 41 км эрбэниллибитэ уонна 700 гектар сир хараардыллыбыта. Туох баар үлэ барыта болдьоммут кэмигэр оҥоһуллубута. Халаан уута хоромньута суох ааһарыгар үлэлэһэбит. СӨ ыксаллаах быһыыга-майгыга управлениетын үлэһиттэрэ уонна оперативнай хамыыһыйа бөлөҕө билигин Ленскэй оройуонугар бааллар. Бу күннэргэ оннук бөлөх Алдаҥҥа, Аммаҕа барыаҕа. Ленскэйгэ мууһу эһээччилэр устар мууһу батыһа Өлүөхүмэҕэ кэлиэхтэрэ. Онон ыксаллаах быһыы-майгы үөскүүр түгэнигэр бэлэм олоробут.