Баһаар туһунан Дьохсоҕон нэһилиэгин баһылыга Петр Захаров кэпсиир:  

--Бөөлүүн Даккы өттүгэр үлэлээн кэллибит. Уонна бу эмиэ баран эрэбит. Аҥаарбыт Боробул бааһыналарын кэтэхтэринэн уот куотуо диэбит сирдэринэн утары уот ыытан, дэриэбинэттэн тэйиттилэр. Биһиэхэ Нерюнгри Чульманыттан кэлбит “Лесавиаохрана” уонна Тааттатааҕы ГАУ “Лесресурс” тэрилтэ байыастара, итиэннэ олохтоох нэһилиэнньэ көмөлөһөр. Кустарнай сухалаах икки ДТ-75 тыраахтар бааллар.

Бастакы күн  былаанын толордубут. Уоту кэтээн куоттарбатыбыт. Үөһэнэн “верховой” кэлэн, ходуһаҕа таһаара сырытта. Быраҕаттанар кыымнарын миэстэтигэр сүүрэ сылдьан умуллардыбыт. Түүннэри ити эҥээри барытын кэрийэн көрдүбүт.

Бараһыылап баһаара Өксөкүлээх карьерыттан уһуктан, иһиирэн-уһууран, сис оройунан барбыт. “Победа” ХЭУо уолаттара, Игидэй водовоһа (суоппар А.Р.Иванов) буолан ходуһаҕа туттулар. Даккы өттүгэр уот айаннаан иһэрин кэтээһиҥҥэ Бараһыылап төрүт олохтооҕо Н.Н. Винокуров, Г.Д. Петров, Трофим Алексеевичтаах, Гаврил Алексеевичтаах хамаандалара күүскэ үлэлээтэ. Эбиэттэн киэһэтин Ытык Күөл баһаарынай сулууспатыттан мунньуллан кэлбит биригээдэ уонна МЧС-тар күүс-көмө буоллулар. 

Даккы өттүгэр үлэлии сылдьан көрдөххө, “верховойдууругар” биир эрэ умнас барбат, уһууран-иһиирэн, иккис кэнниттэн булгуччу эккирэтэр. Чочумча буолаат, оннук үһүс кытыастар. Хас эмэ салаананан, хайысхаланан, олох түргэнник “верховойдуур”. ДТ-75 тыраахтарбыт ону баттаһа кэлэн, былырыыҥҥы опашкалары саҥардан, уоту туттубут. “Победа” ХЭУо МТЗ- 1523 мааркалаах тыраахтара үлэлэһэр. Уоту Чабыыда үрэх айаҕар тиэртибит. 7-с нүөмэрдэх баһаар турбут сиригэр. Онно тардыллыбыт балаһаҕа тиийэн, эрдэтээҥҥи уокка холбоотубут. Аны кэтиибит.

Уоппут Маах хайа өттүгэр сытар. Бүгүн күүһүн-кыаҕын ылынан, Чабыыдаҕа тиийиитигэр, тумус синньээһинигэр быраҕаттыырыгар, уһуктуон иннинэ тиийбиппит. Даккыттан төрүттээх эр дьон көмөҕө кэллилэр.

“Победа” ХЭТУо отун таһыыга күүстээх үлэ барда. Уот турбут сириттэн чугас Ньимиидэттэн тыраахтардаах эр бэртэрэ И.Н.Комиссаров, Г.П.Петров 160-тахса рулону Луковцевтар уһаайбаларыгар тиэйэн аҕалан күрэттилэр.  Гаврил Платонович бэйэтин үтүө санаатынан көмөлөһө сылдьар. Боробултан уоту тэйитэргэ кини уларсыбыт прицепной емкаһа улаханнык абырыыр. Байыастар ранецтарыгар уу кутталларыгар табыгастаах буолла.

“Камаз” оту тиэйиигэ эмиэ көмөлөстө. Дэбдиргэ водовоһу оту харабыллааһыҥҥа туһата улахан. Алгысчыппыт А.Н.Попов бэҕэһээ сир-дойду иччилэриттэн көрдөһөр сиэри-туому оҥорбута уоту бохсорго көмө буолла.

Билигин сүрүн күүс Ытык Күөлү көмүскээһиҥҥэ үлэлиир. Тыал соҕуруулуу илинтэн кэлэр. Ол иһин уот хамсааһына бытаан курдук эрээри, лаҥхалаах үрэхтэргэ таҕыстаҕына, хахыйахтарынан начаас “верховойдуур”. Тыа маннык хайысхата атырдьах ыйын 12 күнүгэр эрэ дииллэр. Онон бу 3 күҥҥэ кытааттын умуруоруоххайыҥ.

Баһаар Боробул бөһүөлэгиттэн Харбалаахха диэри кытыылыыр. Дьон-сэргэ билэр, ити туһаайыытынан тэнийэр систэрбитигэр таас чохтоох дьапталҕалар баалларын. Ону уот хапта да, балаһыанньа уустугуруон сөп. Онон уоту кэтиэхпитин наада. Ити баһаар иэнэ 6 көс.  Хабарга киэҥ территория. Наһаа элбэх киһи умуруорууга наада. Онон ыаллыы сытар нэһилиэкпит дьонун баһаары бохсууга ыҥырабыт. Бүгүн, этэҥҥэ буоллаҕына, Даккы уотун умулларыахпыт.