Норуот дьокутаата  Юрий Николаев  валюта кууруһа халбаҥнааһына өрөспүүбүлүкэ бүддьүөтүгэр куруук мөлтөх өрүттээхтик дьайбатын туһунан эттэ. Холобур, «Сургутнефтегаз» ПАУо  төттөрүтүн сүүйүүлээх тахсыбыт. 2018 сыллаахха өрөспүүбүлүкэ бүддьүөтүгэр былааннамматах эбии үп киирбитэ.  Юрий Михайлович быһаарарынан,  2020 сыл бастакы кыбаартала “АЛРОСА” хампаанньаҕа куһаҕана суох түмүктэри биэрбит. Онон дивиденнэри төлөөһүн былаан быһыытынан хаалла.  Өрөспүүбүлүкэ кэлэр сыл бастакы аҥарыгар дивидени ылары былааннаан олорор. Ол гынан баран, коронавирус дьаҥыттан сылтаан хампаанньа атыыта  мөлтөхтүк бара турара кэлэр сыл иккис аҥарыгар  нолуок киириитигэр уонна дивидент түһүүтүгэр дьайыаҕа.  Онтон гааһы уонна ньиэби хостуур хампаанньалар былаан быһыытынан дохуоту ылыахтаахтарын толору мэктиэлииллэр. Аан дойду үрдүнэн ньиэп сыанатын үрдээһинэ уонна сөптөөх таһымҥа тиийиитэ  экэниэмикэҕэ үчүгэй көрдөрүү буолар.  

Юрий Николаев этэринэн, 2020 сылга бүддьүөт дохуоттаах чааһыгар нолуоктан 10 млрд. солк. киириэ суоҕун сөп. Итини тэҥэ, үөрэх бырагырааматыгар уонна коммунальнай хаһаайыстыба субсидиятыгар ороскуотуруу тахсара күүтүллэр, ол үбэ билиҥҥи туругунан судаарыстыбаннай бүддьүөккэ тиийбэт. Өрөспүүбүлүкэ бүддьүөтүттэн коронавирус дьаҥын утары охсуһууга уонна  содулун туоратыыга анаан эбии 3 млрд. солк. тыырыллыахтаах.  
«Бүддьүөт ороскуоттаах чааһыгар сарбыйыы билиҥҥи туругунан суох. Өскөтүн, дохуоттаах чаас кыайан бигэргэммэтэҕинэ,  инвестиционнай бырагырааманы сэргэ атын судаарыстыбаннай бырагыраамалар ороскуоттарын сарбыйарбытыгар тиийэбит», - диэн өрөспүүбүлүкэ бырабыыталыстыбатыгар бүддьүөтү көннөрөр хамыыһыйа чилиэнэ, норуот дьокутаата Юрий Николаев быһаарар.