Сокуон барылын сүнньүнэн уопсайа 99 көннөрүү киирбит, 97 көннөрүүнү СӨ бырабыыталыстыбата, 2 көнөрүүнү норуот дьокутааттара киллэрбиттэр.

Ол курдук, өрөспүүбүлүкэбит экэниэмикэтин, сайдыытын, бигэ туругун түстүүр сүрүн сокуоммут ханнык тосхоллоох ылыллыбытый? Үп миниистирэ Валерий Жондоров иһитиннэрдэ.

2020 сылы хайдах көрдөрүүлээх атааран эрэбитий? Өрөспүүбүлүкэ бүддьүөтүн дохуоттаах чааһа 22 млрд солкуобайынан улаатыннарыллан 2020 сылга 253 млрд солк. тэҥнэспит. Сүрүн дохуот нолуоктан киирэр. 2020 сылга бу дохуот эбии 10 млрд солк. улаатыннарыллан, 118 млрд. солк. тэҥнэспит. Нолуоктан буолбатах дохуооттан киирэр үп (өрөспүүбүлүкэҕэ оҥоһуллар үлэттэн дохуот) 338 мөл. солк. эбиллэн, 9,4 млрд. солк. буолбут. Оттон дотация, субвенция, субсидия быһыытынан 125 млрд. солк. киирбит, эрдэ барыллаан көрүллүбүт үпкэ эбии 11 млрд солк. киирбит.  

Оттон сокуон ороскуоттаах чааһа 21 млрд солк. улаатан, 260 млрд солк. тэҥнэспит. Барылламмыт ороскуоттаах чаас кыччаан, эбии 11 млрд солк. босхоломмут. Бу үптэн 3,4 млрд солк. үөрэх кыһаларыгар бүддьүөт миэстэтин үбүлээһинигэр, 3,4 млрд солк. одькх тарыыбын тэҥнээһинигэр, 1,4 млрд солк. коронавирус ыарыыны утары охсуһар резербинэй пуондаҕа, 340 мөл. солк. санитарнай авиацияны өйөөһүн тэрээһиннэригэр уонна 500 мөл. солк. муниципальнай тэриллиилэр бүддьүөттэрин тэҥнээһиҥҥэ ыытарга быһаарбыттар. 2020 сылга бүддьүөт дэписсиитэ 8 млрд солк. буолбут.

2021 сылы өрөспүүбүлүкэ судаарыстыбаннай бүддьүөтэ бу курдук сыыппараларынан көрсөр:

Дохуоттаах чааһа 203,4 млрд солк., ороскуоттаах чааһа 204,4 млрд солк., дэписсиитэ 998 мөл. солк. буоларын сабаҕалаабыттар.

Сокуон барылын иккис уонна бүтэһик ааҕыыга ылыннылар. Ил Дархан Айсен Николаев “2020 сылга, итиэннэ 2021 уонна 2022 сыллардааҕы кэмҥэ торумнанар судаарыстыба бүддьүөтүн туһунан” сокуон барылын оҥорууга үлэлээбит Ил Түмэн дьокутааттарыгар махтанна уонна сылы эрэллээхтик түмүктээн эрэбит диэн бэлиэтээтэ. “Бырабыыталыстыба уонна парламент ситимнээх үлэтинэн нолуоктан киирэр үп улаатан, бүддьүөт дохуоттаах чааһын 111 млрд солк-тан, 119 млрд солк. диэри үрдэттибит. Төһө да алмаас хостооһунун бырамыысыланнаһыгар үлэ бытаарбытын иһин, өрөспүүбүлүкэ бүддьүөтэ онтон олус эмсэҕэлээбэтэ. Өссө биир улахан ситиһиибитинэн буолар – Федеральнай бырабыыталыстыбаны кытары үлэлэһиибит. Дотация, субвенция быһыытынан киирэр үп 40 млрд солк. курдук улаатан, 127 млрд солк. буолла”, -- диэн Ил Дархан түмүккэ эттэ.