Бары биир киһи курдук

Антонина Григорьева этэринэн, «Биир ньыгыл Арассыыйа» баартыйа фракциятын дьокутааттара бу ааһан эрэр сылга элбэх үлэни ыыппыттар. Олортон биир дьоһуннаахтара -- дьокутааттар бэйэлэрин үптэринэн бу ыарахан кэм бүрүүкээбитинэн өрөспүүбүлүкэ нэһилиэнньэтин кыаммат араҥатыгар уонна коронавирус дьаҥа тарҕаныытын утары охсуһар мэдиссиинэ тэрилтэлэригэр,  быраастарга көмө оҥорбуттара буолар.  Ол курдук, өрөспүүбүлүкэҕэ  пандемия саҕаланаатын кытта дьокутааттар  тута   суһаллык быһаарыы ылынан, 333 тыһ. солк. харчыны хомуйбуттара уонна онно эбии ыам ыйыгар биир күннээҕи хамнастарын биэрбиттэрэ. Бу хомуллубут үп сэрии бэтэрээннэригэр, кинилэр огдооболоругар, соҕотох олорор аҕам саастаах дьоҥҥо, элбэх  оҕолоох ыалларга бородууктанан көмөҕө туһаныллыбыта.  Манна эбэн этэр буоллахха,  Бүтүн Арассыыйатааҕы «Биир ньыгыл Арассыыйа» баартыйа  быһаччы ыҥырыытынан ыытыллыбыт аһымал аахсыйаҕа биһиги дьокутааттарбыт  көхтөөхтүк кыттан көмөлөстүлэр. Антонина Афанасьевна фракция чилиэннэрэ ааһан эрэр сылга волонтер хамсааһыныгар кыттан, төһө кыалларынан көмө  оҥорбуттарын тоһоҕолоон бэлиэтээтэ.

Чопчу көмө -- көдьүүстээх

Дьокутаат Руслан Федотов Амма улууһун  киин балыыһатыгар көмө быһыытынан салгын 3 рециркуляторын биэрбит. Кини  норуот дьокутаата Мария Христофоровалыын Дьокуускайдааҕы  инфекционнай балыыһаҕа  көрдөрүнээччилэр ааттарыттан 10 устуука жалюзи  бэлэхтээбиттэр. Оттон дьокутаат Иван Данилов ити балыыһаҕа микроволновай оһоҕу биэрэн көмөлөстө. Итини тэҥэ,  кини  “Дьиэҕэ үөрэнэргэ көмөлөс” аахсыйа чэрчитинэн элбэх оҕолоох ыалларга ноутбуктары атыыласпыт уонна  Марина Силкиналыын Оҕо инфекционнай балыыһатыгар  көһөрүллэ сылдьар  рециркуляторы атыылаһан биэрбиттэр.

Норуот дьокутаата  Наталья Румянцева  бэйэтин үбүнэн «УАЗ» массыына уонна мэдиссиинэ үлэһиттэригэр  харыстанар сириэстибэлэри Нам улууһунааҕы  киин балыыһаҕа  биэрбит. Итини тэҥэ, парламентарий  суола-ииһэ суох Салбаҥ нэһилиэгиттэн дьон улуус киинигэр киирэллэригэр  көмөлөспүт. Саҥа дьылы көрсө  Бүтүн Арассыыйатааҕы инбэлииттэр уопсастыбаларын өрөспүүбүлүкэтээҕи  тэрилтэтин нөҥүө Нам улууһугар, Тулагы сэлиэнньэтигэр уонна  Пригороднай бөһүөлэккэ олорор 70 инбэлиит оҕоҕо бэлэх оҥорон туттартаата.

Дьокутаат Владимир Чичигинаров Өрөспүүбүлүкэтээҕи инфекционнай балыыһаҕа  мэдиссиинэ үлэһиттэригэр үлэлэрин чэпчэтэр табыгастаах миэбэли атыылаһан бэлэхтээбит. Парламентарий  Дьокуускай куораттааҕы  мэдиссиинэ тэрилтэлэрин отделениеларыгар уонна  Өрөспүүбүлүкэтээҕи  харах  балыыһатыгар  бородуукта наборун биэрбит.  Итини тэҥэ,  Дьокуускай куорат  Строительнай уонна Киин уокуруктарыгар олорор оҕолорго  Саҥа дьыллааҕы 20 бэлэҕи утары уунна.

Ил Түмэн Бэрэссэдээтэлин бастакы солбуйааччы Александр Жирков  социальнай тэрилтэлэргэ  анаан өрөспүүбүлүкэ хаһыаттарыгар уонна сурунаалларыгар  суруттаран биэрбит.  Дьокутаат Феодосия Габышева «Дьиэҕэ үөрэнэргэ көмөлөс» аахсыйаҕа кыттан, Үөһээ Бүлүү улууһун кыаммат уонна элбэх оҕолоох ыалларыгар көмөлөспүт. Феодосия Васильевна  «Үтүө санаа харыйата» аахсыйаны өйөөн,  Үөһээ Бүлүү улууһугар кыаммат уонна элбэх оҕолоох ыаллар оҕолоругар 20 тыһ. солк. сыаналаах Саҥа дьыллааҕы бэлэҕи ыыппыт. Итини тэҥэ, бу күннэргэ Оҕо онкологическай балыыһатыгар харыйа атыылаһан биэрдэ.  Кини  быһаччы көҕүлээһининэн, «Биир ньыгыл Арассыыйа» баартыйа фракциятын  саҥа үлэтин хайысхатынан  «кыһыл зонаҕа» үлэлии сылдьар миэдиктэр оҕолоро биир кэлим эксээмэҥҥэ  босхо бэлэмнэнэллэрин көҕүлээбитэ.

Дьокутаат  Виктор Федоров  Дьокуускай  балыыһатын пульмонологияҕа отделениетыгар   харыйа  атыылаһан туруоран биэрбит. Итини тэҥэ, «Кыһыл зонаҕа» үлэлиир миэдиктэр оҕолоругар Саҥа дьыллааҕы элбэх бэлэҕи анаабыт.  Дьокутаат  Алиш Мамедов «Дьиэҕэ үөрэнэргэ көмөлөс» аахсыйаны өйөөн,  кыаммат уонна элбэх оҕолоох ыалларга ноутбуктары бэлэхтээбит. Ону таһынан Хаҥалас улууһунааҕы киин балыыһаҕа салгын рециркуляторын уонна харыстанар сириэстибэлэри биэрбит. Дьокутаат Павел Петров бэйэтин быыбардыыр уокуругар кыаммат уонна элбэх оҕолоох ыалларга Саҥа дьыллааҕы 250 бэлэҕи бэлэмнээбит. Дьокутаат бэйэтин уокуругар Саҥа дьылы көрсө, үтүө үгэһин тутуһан,  харыйа бэлэхтээбит.  Дьокутаат Антонина Григорьева «Эмчиттэргэ -- харыйа»  Cаҥа дьыллааҕы  аахсыйаны өйөөн,  Ньурба улууһунааҕы балыыһа инфекционнай отделениетыгар  харыйа уонна киэргэллэри бэлэхтээбит. Билигин ити отделениеҕа хамсык дьаҥар хаптарбыт ыарыһахтар эмтэнэллэр. «Баҕа санаа харыйата» Бүтүн Арассыыйатааҕы  аһымал аахсыйа чэрчитинэн, инбэлиит оҕо  Саҥа дьыллааҕы баҕа санаатын толорон,  үрдэриллэр бассейны  уонна Ньурба улууһун үөрэнээччилэригэр  «Дьиэҕэ үөрэнэргэ көмөлөс»  аахсыйаны өйөөн, 10 планшеты бэлэхтээтэ. Антонина Афанасьевна   сыл аайы социальнай хайысхалаах тэрилтэлэргэ  өрөспүүбүлүкэ хаһыаттарыгар уонна сурунаалларыгар суруттарар үтүө үгэһин быйыл эмиэ салҕаата. 

Дьокутааттар Андрей Находкин уонна Юрий Баишев бэйэлэрин уокуруктарыгар  аҕам саастаах  34 киһиэхэ  Саҥа дьыллааҕы бэлэҕи бэлэмнээбиттэр. Дьокутаат Валерий Лютай супер-маҕаһыыннарга анаан тэриллэр “Үтүө санаа корзината” Бүтүн Арассыыйатааҕы  аһымал аахсыйаҕа кыттан,    кыаммат уонна элбэх оҕолоох ыалларга көмөлөспүт уонна волонтердар хамсааһыннарыгар кыттан,  бэтэрээннэргэ уонна искэн ыарыылаах дьоҥҥо бородууктаны уонна саамай туһаныллар табаардары тарҕатыыга көмөлөспүт. Дьокутаат Оксана Михайлова Өлүөхүмэ куорат поликлиникатын оҕо отделениетыгар  саҥа массыына бэлэхтээтэ. Дьокутааттар Владимир Прокопьев,  Юрий Николаев, Аркадий Алексеев, Алена Алексеева «Бэтэрээн, Саҥа сылынан!» диэн Бүтүн Арассыыйатааҕы  аахсыйаҕа кыттан, Аҕа дойду сэриитин кыттыылаахтарыгар Саҥа дьыллааҕы 40 бэлэҕи оҥордулар.

Норуот дьокутааттара Иван Андреев, Алена Атласова, Юрий Баишев, Феодосия Габышева, Петр Гоголев, Елена Голомарева, Антонина Григорьева, Иван Данилов, Матвей Евсеев, Александр Жирков, Родион Зорин, Валерий Лютай, Андрей Находкин, Юрий Николаев, Владимир Прокопьев, Марина Силкина, Александр Слоик, Руслан Федотов, Владимир Чичигинаров, Любовь Явловская быыбардааччыларын кытта  көрүстүлэр. 104 киһиттэн араас хабааннаах ыйытыы киирбит. Ол курдук, Елена Голомареваҕа 24, Антонина Григорьеваҕа 17,  Александр Слоикка уонна  Алиш Мамедовка 10-нуу, Андрей Находкиҥҥа уонна  Феодосия Габышеваҕа 9-туу, Валерий Лютайга  8 киһи мунаарар боппуруостарын, кыһалҕаларын этиммиттэр.

Дуоһуйарга, уоскуйарга эрдэ

«Ыытыллыбыт  үлэнэн дуоһуйан, онон уоскуйан хааларга эрдэ. Төттөрүтүн, инники өттүгэр өссө тэбиэһирэн туран үлэлииргэ көҕүлүөхтээх», -- диир  Антонина Григорьева. Кини үлэ манан түмүктэммэтин, ол эбэтэр Саҥа дьыллааҕы уһун өрөбүллэргэ – тохсунньу 1-11 күннэригэр -- быраастарга көмөлөһөр инниттэн  Дьокуускай куорат поликлиникаларын Call-кииннэригэр дьокутааттар дьуһуурустубалаан, киирэр боппуруостары түргэнник быһаарарга көмөлөһүөхтэрэ диэн эттэ. Ону сэргэ  быраастары тиэйии-таһыы,  мэдиссиинэ тэрилтэлэрин үлэһиттэрин аһылыгынан хааччыйыы уонна бэтэрээннэргэ, искэн ыарыылаахтарга  бородууктанан,  саамай туһаныллар табаардарынан көмөлөһүү үлэлэрэ салгыы ыытыллыахтара.

«Кэллиэгэлэрим   үөһэ этиллибит үлэлэри олоххо киллэрэргэ  өссө көхтөөхтүк кытталларыгар баҕарабын, Саҥа дьыл уһун өрөбүллэригэр эмиэ. Билигин  кутталлаах ыарыы бүрүүкээн турар кэмигэр дьоҥҥо көмө бары көрүҥэ тоҕоостоох буолуо. Онон өрөспүүбүлүкэ дьонугар-сэргэтигэр көмөлөһөр үлэбитин өссө кэҥэтиэхпит», -- диэн «Биир ньыгыл Арассыыйа» баартыйа Ил Түмэҥҥэ фракциятын салайааччыта  Антонина Григорьева санаатын үллэһиннэ.

Ил Түмэн пресс-сулууспата