«Биир ньыгыл Арассыыйа»

Госдуума дьокутаата, “Биир ньыгыл Арассыыйа” баартыйа чилиэнэ Игорь Дивинскэй “О банках и банковской деятельности” сокуоҥҥа уларытыылары киллэрэр туһунан сокуон бырайыагын бэлэмнээтэ.

—Дьон харчытын уурдарарыгар бааннары кытта дуогабар түһэрсэр уонна онно ыйыллыбыт бырыһыанынан ылыам диэн бүк эрэнэр. Ону баара, суоттаабытынааҕар быдан кыра сууманы киниэхэ биэрэллэр. Тоҕо диэтэххэ, дуогабар анныгар бытархай буукубаларынан суруллубут сөбүлэҥи өйдөөн көрбөттөр. Онно баан бэйэтигэр барыстаах усулуобуйаны бэчээттээбит буолар. Ол-бу буолар-буолбат страховкалар,  эҥин араас комиссиялар төлөбүрдэрин тутарын туһунан, — диэн быһааран кэпсиир  Игорь Дивинскэй.

Дьону маннык угаайыга укпат туһуттан барытын ырылхайдык — хас угуллубутун, туохха туппуттарын, төһө эбиллибитин, хаһы ыларын көрдөрөр табылыысса оҥоһуллуохтааҕын парламентарий бэлиэтиир. “Оччоҕуна эрэ уурдарааччы балыйтарыа суоҕа. Бу саҥа сокуон ити кыра шрифтээх тиэкиһи улаханнык бэчээттиири ирдиир. Кирэдьиит ылааччылар эмиэ маннык халбаҥ дуогабар хабалатыгар киирэн биэрээхтииллэр уонна эрэннэриллибит 9 %-нарын оннугар сылга 15-тии %-ны төлүүллэр. Кинилэри эмиэ бу сокуон көстөн турар албынтан араҥаччылыыр соруктаах. Бааннар бу албастарыттан элбэх кыһалҕа үөскүүр, онон түргэнник тустаах боппуруоһу быһаара охсуохха”, — диир.

Кинини кытта сокуону оҥорсубут дьокутаат Мартин Шаккум: “Ити табылыысса диэн бэртээхэй быһаарыы. Онно уурдарыы болдьоҕо, бырыһыана, эрдэ ылар түгэннэригэр хас бэриллиэхтээҕэ эҥин барыта ыйыллыахтаах. Билиҥҥи  сыыппара үйэтигэр барыта дьэҥкэ буолуохтаах, электроннай көрүҥүн килийиэн бэйэтэ сыныйан көрүөхтээх, сиһилии ааҕыахтаах, ол кэннэ биирдэ илии баттыахтаах. Оттон табылыысса хайдах киэптээх буоларын Арассыыйа Баана бигэргэтиэхтээх”, — диэн эбэн этэр.

РФКП 

Бу күннэргэ сырдатар-көрдөрөр эйгэҕэ хомуньуустар аҕа баһылыктара Геннадий Зюганов “Будущее России и Китая — в дружбе и всестороннем сотрудничестве!” диэн уоттаах-төлөннөөх этиитин сыныйан ырыталлар.

РФКП бэрэссэдээтэлэ этэринэн, Дональд Трамп социалистическай  Кытай сайдар кэскилин сарбыйар бэлиитикэни күүскэ ыыта олорор. “Урукку өттүгэр Синьцзян-Уйгур уонна Тибет автономиялаах оройуоннарын күөртүү, былааҺы утары туруора сатаабыта. ВТО быраабылатын кэһэн туран, кытайдарга таможня төлөбүрүн (пошлинатын) үрдэппитэ. “Huawei” курдук улахан хампаанньаларыгар харгыстары оҥортообута. Онно да улуу Кытай бэриммэтэҕэ, самныбатаҕа. Ол иһин бара сатаан, аны Кытай хомуньуустарын баартыйатын “АХШ-га суоһурҕанар” диэн сураҕы ыытта. Онуоха АХШ Судаарыстыбаннай сэкирэтээрэ Майк Помпео: “Бу “хаҕыс сэриигэ” Вашингтон Арассыыйалыын куомуннаһар соруктаах”, -- диэн аһаҕастык билинэр. АХШ бары өттүнэн, оннооҕор коронавируһу утары охсуһууга Кытайга баһыйтаран иһэр. Ол иһин модун Сэбиэскэй Сойууһу эспит ньыматынан аны Кытайы кыдыйаары гынар. Онуоха Помпео: «Если свободный мир не изменит коммунистический Китай, то коммунистический Китай наверняка изменит нас. Свободный мир должен одержать победу над новой тиранией!» — диэн, атын судаарыстыбалары утары туруортуу, өстөһүннэрэ сатыыр. Онно киирэн биэримиэхпитин наада. Биһиги баартыйабыт ыаллыы сытар Кытайы кытта урут-уруккуттан олоҕурбут доҕордоһуубутун өрө тутарбытыгар, тэҥҥэ сайдар суолу тутуһарбытыгар ыҥырар”, — диир хомуньуус Геннадий Зюганов.

«Сиэрдээх  Арассыыйа»

 “Бу коронавирус дьаҥа эмп дефицитин үөскэттэ. РФ Доруобуйатын харыстабылын министиэристибэтэ COVID-19 ыарыыга дьайар, үтүөрдүөн да сөп препараттар испииһэктэрин таһаарыаҕыттан ыла, аны ол эмтэри аптекалартан булар уустук буолла. Ол түмүгэр саастарын тухары ити эмтэри иһэ сылдьыбыт ааспат-арахпат “хроническай” ыарыылаахтар буорайдылар, дьарҕалара көптө. Мин аадырыспар бу боппуруоһунан наһаа элбэх үҥсүү киирэр буолла. Ол иһин пандемияны кытта тэҥҥэ күөдьүйбүт бу кыһалҕаны быһаарарга РФ Бырабыыталыстыбатын иһинэн оробуочай бөлөҕү тэрийэргэ этии киллэрбитим сыл аҥаара буолла. Түүннэри-күнүстэри үлэлиир элбэх ханааллаах төлөпүөн баар буолуохтаах. Дьон бэйэтэ онно эрийэн, ханнык сиргэ туох суоҕун этиэхтээх. Оччоҕо эрэ эрэгийиэннэр эминэн быстарбакка олоруохтара, оттон үрдүкү салалта бу боппуруоһу хонтуруолга ылыа, балаһыанньаны билэн олоруо этэ. Ону биһиэнэ барыта кэнниттэн доҕуһуолланар. Ол курдук, бу соторутааҕыта РФ вице-премьерэ Татьяна Голикова 5 эрэгийиэҥҥэ ВИЧ ыарыылаах дьон "Ритонавир" диэн эмтэрэ бүппүтүн туһунан социальнай ситимнэртэн сурах-садьык курдук истэн, ол “үһү” төһө оруннааҕын бэрэбиэркэлэтэргэ сорудахтаата. Итинник кыһалҕалаах эрэгийиэн элбэҕэ чахчы. Холобур, Калининградка бу саастан ыла гемофилиялаахтар эмтэнэр препараттара бүппүтүн туһунан этэ-айдаара сатаатылар аҕай. Онуоха хас маннык түбэлтэ аайы вице-премьер дуу, бырабыыталыстыба бэрэссэдээтэлэ дуу анал сорудах биэрэрин кэтэһэ олорор табыгаһа суох ини. Уонна бу аҥаардас Доруобуйа харыстабылын министиэристибэтин дуу, биитэр Роспотребнадзор дуу төбөтүн сынньар кыһалҕата буолбатах. Бу – судаарыстыба таһымыгар быһаарыллыахтаах боппуруос. Ол иһин манна биэдэмистибэлэри дьаһайар боломуочуйалаах уорган тэриллэрэ оруннаах. Оччоҕуна эрэ дьыала миэстэтиттэн сыҕарыйыаҕа. Аны туран, Росздравнадзор боломуочуйатын эмиэ кэҥэтэргэ эппиппитин, хата, РФ Бырабыыталыстыбата биһирээтэ. Росздравнадзор ханнык эмкэ нэһилиэнньэ ордук наадыйарын, туох суоҕун, тиийбэтин билэр сыаллаах мониторинг ыытыахтаах. Холобур, аутоиммуннай патологиялаах дьоҥҥо наадалаах "Азатиоприн" препараты билигин тымтыктанан да булбаккын. Ону Доруобуйа харыстабылын министиэристибэтигэр, дьэ, хойутаан тиэрдэннэр, бу күһүҥҥүттэн  саҥа таһаараары сылдьаллар”, --  диэн санаатын үллэстэр “Сиэрдээх Арассыыйа” баартыйа бэрэссэдээтэлэ Сергей Миронов. 

РЛДП

Бүддьүөт кодексыгар уларытыылар киирдилэр. Ол курдук, аны мантан ыла тутуллубут коррупционер хантан уонна хайдах ылбытын сатаан дакаастаабат харчытын тустаах уорганнар тута былдьыыр уонна Биэнсийэ пуондатыгар биэрэр кыахтаналлар.

—Ити саамай сөп быһаарыы, — диир либерал-демократтар салайааччылара Владимир Жириновскай. – Биэнсийэ реформатын чэрчитинэн бу сокуон ылынылынна. Ол эрээри сокуон туох да итэҕэһэ-быһаҕаһа суох чопчу үлэлиирин туһуттан билигин Үп министиэристибэтэ сорох түгэннэрин чопчулуу сылдьар. Холобур,  аҥаардас бэрик эрэ харчытын буолбакка, хайдах кэлбитин кистиир харчытын барытын былдьыыр оруннаах. Биллэн турар, туга да суох турар бэйэтэ эрэ хаалыа суоҕа. 300 мөл. солк. туттахтарына, итинтэн 200-гэр киниэнэ буоларын туоһулуур докумуоннаах буоллаҕына, 100-һүн эрэ ылалларыгар тиийэллэр. Уонна бу сокуон чунуобунньуктарга эрэ буолбакка, гражданнарга барыларыгар тарҕанара оруннаах. Тоҕо диэтэххэ, билигин дуоһунаһыттан тутулуга суох уоран сиэччи элбэх. Бүддьүөт кодексыгар бу уларыйыылар киирбиттэрэ хайҕаллаах. Кырдьаҕастар барахсаттарга биэнсийэлэрин дуомугар син итинник буолар үп-дохуот эбиилик ньыманан киириэ этэ.