Госдума дьокутаата, “Сиэрдээх Арассыыйа” бэлитиичэскэй баартыйа Саха сиринээҕи салаатын лиидэрэ Федот Тумусов уһулуччулаах педагог Михаил Андреевич Алексеев туһунан санаатын үллэһиннэ:

Михаил Андреевич Алексеев тэрийбит физмат кылааһыгар үөрэммит дьоллоохпун. Биһиги кылааска кини уруок биэрбэт этэ. Ол эрээри кини үөрэтиитин, дьайыытын күн аайы эппитинэн- хааммытынан билэр этибит. Хас биирдиибитин такайар, сүбэлиир, мөҕөр да этэ.

Биһиги үөрэнэрбит саҕана физмат кылаастар үс эрэ кылаас батар кыра дьиэҕэ үөрэммиппит. Ону " кабинет" диэн ааттыыр этибит. Арааһа, былыргыта оскуола мастерскойун дьиэтэ быһыылааҕа. Онно киирэн иһэн хас биирдии үөрэнээччи ыйытар этэ: "Мэхээлэ баар дуо?"–  диэн. Ол курдук дьулайар этибит. Хайаан да үчүгэйдик тэбэнэн, саппыкыбытын кылбаччы сууйан киириэхтээхпит. "Соҕуруу куораттарга үөрэнэ бардаххытына, эһигини тутта- хапта сылдьаргытынан бүтүн саха омугу сыаналыахтара!" –  диэн кытаанах ирдэбиллээх буолара. Биирдэ Коля Д. "кабинекка" кирдээх саппыкынан киирбитигэр Михаил Андреевич тобуктаан туран кини саппыкытын сууйбута. Оо, онно кыбыһыннахпытыан! Биирдэ саҥа миэбэл кэлбитэ. Онно биир олоппоһу алҕас алдьаппыт оҕону мас тооромоһунан охсубута быһыылааҕа. Абаккатыттан.

Ким ханна үөрэнэ барыахтааҕын ыйан- кэрдэн сүбэлээн биэрэрэ. Миэхэ биирдэ: “Эн тыа хаһаайыстыбатын инженера буол”, –  диэн сүбэлээбитэ. “Кэлин совхоз кылаабынай инженера буолуоҥ этэ”, – диэн эппитэ. Ол аата, бука, наһаа үөһэнэн көппөккө, сиринэн хаам диэтэҕэ буолуо.

Нерюнгри куоракка үлэлээн баран дойдубар, Үөһээ Бүлүүгэ, тутуу тэрилтэтин бастакы салайааччытынан үлэлээн истэхпинэ, Михаил Андреевич анаан- минээн кэлэн кэпсэтэн, алҕаан барбыта.

Биирдэ кылааспытыгар сүрдээҕин хомойбут бэйэтэ киирэн кэлбитэ уонна биир наһаа үчүгэй, кыраһыабай учуутал атын сиргэ көһөн, бу сиртэн барбытын туһунан кэпсээбитэ тоҕо эрэ өйбөр хаалан хаалбыт.

Уопсайынан " кабинекка" үөрэнэр кэммитигэр биһиги бука бары Михаил Андреевич дабыдалын анныгар сылдьыбыппыт.  Учууталым кыҥаан , сыаналыырдыы, " дьоҥҥун- сэргэҕин, төрөппүттэргин, омуккун түһэн биэримэ" диэбиттии көрөр харахтарын билигин да умнубаппын, мэлдьи миигин кыраҕытык кэтиир курдуктарын саныыбын.