Хараалга бэтэринээринэй дьаһаллар бөлөхтөрүн сэбиэдиссэйэ Дария Кириллова, бэтэринээр быраас Виталий Дмитриев, Харыйалаах бэтэринээрэ Анатолий Егоров уонна Бэтэринээрийэ департаменын Өлөөн эбэҥки оройуонугар ыстаарсай судаарыстыбаннай иниспиэктэрэ Мария Яковлева үлэлээтилэр. Кинилэр хаһаайыстыбалар исписэлиистэрин кытары ыстаада табаларын аахтылар, саастарынан уонна аналларынан наардаатылар итиэннэ эмтиир-сэрэтэр дьаһаллары ыыттылар, хаан анаалыһыгар боруоба ыллылар. Табаһыттарга таба сыстыганнаах ыарыыларын тустарынан кэпсээтилэр, атахсыт уонна эдемагеноз ыарыылартан хайдах сэрэниэххэ сөбүн быһаардылар. Оройуоннааҕы тыа хаһаайыстыбатын исписэлиистэрэ «Өлөөн» МУТ табаларыгар чиптэри кэтэртилэр. Табалар этэҥҥэ сайылаабыттар, төрүөх да куһаҕана суох буолбут диэн Тыа хаһаайыстыбатын министиэристибэтин Хотугу үгэс буолбут салааларга департамена иһитиннэрэр.
- 0
- 0
- 0
- 0
- 0
- 0