Бастыҥнарга наҕараада туттарар дьоро түгэн Сочи куорат Зимнэй тыйаатырыгар буолан ааста. Дьүүллүүр сүбэ бэрэссэдээтэлэ, биллиилээх режиссер Борис Хлебников кыайыылаахтар ааттарын киэҥ араҥаҕа иһитиннэрдэ. Ол түмүгүнэн бэстибээл сүрүн бирииһэ Амматтан төрүттээх режиссер Дмитрий Давыдов “Пугало” диэн киинэтигэр тигистэ.

– Кыайан итэҕэйбэккэ сылдьабын. Саха киинэтэ “Кинотавр” курдук таһымнаах бэстибээлгэ аан бастакытын үрдүктүк сыаналанна. “Гран-при” диэбиттэригэр бары соһуйан тылбытыттан маттыбыт, – диэн Дмитрий Давыдов наҕараадатын ыла тахсарыгар уйадыйан туран тыл эттэ.

Бэстибээл наҕаадалара манан бүппэттэр. Саха киинэтэ чахчы күннээтэ, хаардыы хаамта. Ол курдук, ырыаһыт Валентина Романова-Чыскыырай бу киинэҕэ оруолун иһин “Бастыҥ дьахтар оруола” диэн анал ааты ылары ситистэ. Ону таһынан Даниил Дондурей аатынан бирииһи Арассыыйа киноведтарын уонна критиктарын гильдията эмиэ Дмитрий Давыдов “Пугало” диэн киинэтигэр анаата.

– Режиссер уонна артыыстар үлэлэрэ чахчы сөхтөрөр. Бу дьоҥҥо айылҕа ураты алыптаах дьоҕуру бэрсибитэ өтө көстө сылдьар. Үс сылы быһа Арассыыйа киинэтин индустриятын үлэһиттэрэ “сахалар алыптаах дьикти дьоҕурдарын” сөҕө-махтайа көрөбүт, – диэн киинэ критига Егор Москвитин өрө күүрүүлээхтик санаатын үллэстибитэ элбэҕи этэр.  

Дмитрий Давыдовы уонна кини айар кэлэктиибин сөҕүмэр ситиһиилэринэн эҕэрдэлиибит!