Петр Ефремов, бэтэринээр, Амма улууһа:

— Биһиги үлэбит үгэнэ. Саас буолан сүөһү төрүүр кэмэ. Маны сэргэ сылгыттан анализка диэн хаан ыла сылдьабыт. Бэтэринээр үлэтэ өрөбүлэ суох. Тыа сиригэр сүөһү, сылгы, дьиэ сүөһүтэ көрүүнү-харайыыны ирдиир. Ферма сүөһүтүн ааһан, чааһынайдарга эмиэ сылдьабыт. Күнү-күннүктээн үлэлиирбит баар суол. Биллэн турар, барыларыгар көмөлөһөр эбээһинэстээхпит, ол да буоллар, илии тиийбэт буолааччы.  

Тимофей Константинов, сылгыһыт, Амма улууһа:

— Билигин “Болугур ТХПК” сылгыларын өрүс уҥуортан бэтэрээ көһөртүү сылдьабыт. Уопсайа бэһиэ буолан, 114 убаһаны уҥуортан үүрэн киллэрдибит. Сылгыларбытын биири да мүччү туппакка, этэҥҥэ аҕалтаатыбыт диэн үөрэбит. Сотору хаайтарыы буолуо турдаҕа. Харантыын диэн биһиги үлэбитигэр көрүллүбэт. Биһиги күнү быһа ат үрдүттэн түспэккэ үлэлиир буоллахпыт. Хата, сибиэһэй салгыҥҥа сылдьабыт.

Анна Слободчикова, Чурапчы:

— Сүөһү ииттэн саханы саха дэтэн олордохпут. Тыа сирин атарахсыталлара баар дьыала. Ас-таҥас хантан кэлэрин өйдүөх баар этэ. Биһиги түөрт истиэнэҕэ хааллан олордохпутуна, үлэ тохтуур, сүөһү эстэр буоллаҕа дии. Сүөһү кутуругун манаабыттар диэн сэнэбилгэ сылдьар кэм хаһан бүтэр... Тыа сиригэр улахан көмө, сөхсүтүү наада. Тыа сирин үлэһит дьонун көмүскүүр, үлэлэрин сыаналыыр өйөбүл баар буолуохтаах.

Михаил Слепцов, биэнсийэлээх, Бүлүү:

— Биһиги ыал ииттэн-аһаан олорор ньымабыт – сүөһү иитиитэ. Кэргэмминээн солбуйса сылдьан хотоҥҥо үлэлиибит. Билигин уопсайа алта ынах төрөөтө. Барыта сүүрбэттэн тахса төбөлөөхпүт. Быйыл туруктара этэҥҥэ. Сайын хотоммутун кэҥэттибит киһи диэн баҕалаахпыт. Маны таһынан, хортуоппуйга анаан бааһыналаахпыт, оҕуруот аһын үүннэрэбит. Харантыын диэн тыа сиригэр суох бөҕө буоллаҕа дии. Сарсыарда 5-6 чааска туран, хотоммутугар тахсабыт. Ынахтарбытын ыан, аһаталаан баран, аны күнүһүн уулата тахсабыт. Билигин сылыйан субан сүөһү үксүн таһырдьа сылдьар буолан абыраата. Сотору таһырдьа да хоноллоро чугаһаата.

Тыа дьоно барахсаттар... Кэпсэппит дьонум үксэ үлэлэрин-хамнастарын үгэнэ буолан, бары да таһырдьа сылдьар буолан биэрдилэр. Баары-баарынан, быыс булан кэпсээбиттэригэр махтанабын.