Бүгүн «Сахамедиа» медиакииҥҥэ «Манчаары оонньуулара» XXI спартакиада хайдах быһыылаахтык ыытыллыаҕын туһунан пресс-кэмпириэнсийэ буолла. Суруналыыстар ыйытыыларыгар Горнай улууһун баһылыга Никита Андреев, Успуорт миниистирин солбуйааччы Александр Бугаев, В.Манчаары аатынан успуорт национальнай көрүҥнэригэр киин дириэктэрэ Гаврил Мохначевскай уонна XXI спартакиада кылаабынай судьуйата Семен Горохов эппиэттээтилэр.
«Манчаары оонньууларыгар» успуорт 11 көрүҥүнэн күрэхтэһиэхтэрэ. Уопсайа 200 мэтээл оонньонуоҕа, сүрүн бириистэринэн массыына уонна сертификаттар буолуохтара.
Спартакиада Горнай Бэрдьигэстээҕэр буолар. Билиҥҥитэ улахан успуорт саалата бэлэм. Никита Андреев иһитиннэрбитинэн, «Эйэ» искибиэрин туппуттар, ипподрому саҥардыы үлэтэ ыытыллар, 4 тыһ. олорор миэстэлээх стадиону, 50 миэстэлээх интэринээттээх сыал ытар комплексы бэлэмнииллэр.
XXI «Манчаары оонньуулара» спартакиада 6,5 тыһ. киһини хабар. Олор истэригэр кыттааччылар, тэрийээччилэр, информационнай сырдатыыга үлэлиир дьон киирсэллэр. 39 хамаанда кыттара биллибит.
Суруналыыстар коронавирус ыарыыттан харыстаныы миэрэтин туһунан ыйытыыларыгар: «Спортсменнар, тэрийээччилэр бары COVID-19 ыарыыттан быһыыны ылбыт буолуохтаахтар. Эбэтэр ПЦР уонна ИФА анаалыһын түмүгүн илдьэ кэлиэхтээхтэр. Анаалыстарын туттаралларыгар ороскуоту муниципальнай тэриллиилэр сүгэллэригэр этии киллэрбиппит. Көрөөччүлэр бэйэ-бэйэлэриттэн тэйиччи олоруохтара», -- диэн Александр Бугаев иһитиннэрдэ.
СӨ успуордун министиэристибэтэ Роспотребнадзору кытары күрэхтэһии кэмигэр коронавирус ыарыыттан харыстаныыны хааччыйар бэрээдэк докумуонун бэлэмнииллэр. Александр Бугаев эппититинэн, манна сыһыаннаах эбийиэктэр бары харыстанар сириэстибэлэринэн хааччыллаллар.
XXI «Манчаары оонньуулара» спартакиада аһыллыытын, түмүктээһинин уонна күрэхтэһиилэрин «Саха» көрдөрөр-иһитиннэрэр хампаанньа биэриилэригэр быһа эфиринэн көрдөрүөхтэрэ.
- 0
- 0
- 0
- 0
- 0
- 0