“Оһуор” муода устуудьуйата 2000 сыллаахха тэриллибитэ. Бу 21 сыл устата оҕолор устуудьуйаҕа сылдьан, кэрэлиин алтыһан, кэрэхсэбиллээҕи айан-тутан, айар дьоҕурдарын сайыннаран, элбэххэ үөрэнэн кэллилэр.

Хас биирдии киһи төрөөбүт дойдутун, норуотун култууратын, өбүгэлэрин төрүт дьарыгын билиэхтээх диэн сыалтан сиэттэрэн, уруккуну сөргүтэн, былыргыны чинчийэн, оһуордарын-мандардарын үөрэтэн, ону барытын аныгылыы киэпкэ киллэрэн, билиҥҥилии моһуоннаан, сахалыы колориттаах таҥастары тигэн-оҥорон таһарааллар.

--Холобура, өбүгэлэрбит туос иһиттэрин-хомуостарын, онтон да атын олоххо-дьаһахха туттуллар малларын көрөн-билэн бараммыт, биһиги туостан аныгылыы авангарднай таҥаһы оҥосторго санаммыппыт. Бары сүбэлэһэн баран, “олоҥхоҕо олоҕуран үлэлиэҕиҥ” диэн санааҕа кэлбиппит, -- диэн кэпсииллэр “оһуордар”.  

Олоҥхону ааҕан баран, хас биирдии оҕо бэйэтин персонаһын талбыт.   Ол уобарас хайдах буолуохтааҕын фантазиялаан уруһуйдаабыттар, эскиһин ойуулаабыттар уонна, дьэ, көстүүмнэрин оҥостон саҕалаабыттар.

--Таҥастарбытын оҕуруонан киэргэтэр буоламмыт, оҕуруо сахалыы ааттарын биллибит. Холобура, “сылгы иигэ оҕуруо” – сырдык кугас, “балык хараҕа оҕуруо” – маҥан бытархай оҕуруо. Оһуордар суолталарын эмиэ сиһилии үөрэттибит.

Бу үлэбит иннинэ сиэли хатарга, араас утаҕынан өрөргө үөрэммиппит. Алена Дмитриева эскизтэринэн авангард стиллээх “Сиэлтэн сиэдэрэйин, кылтан кылаанын» кэллиэксийэни оҥостубуппут. Араас куонкурустарга кыттан, бириистээх миэстэлэргэ тиксэрбит. Өссө научнай үлэ суруйан, кэмпириэнсийэлэргэ кыттарбыт. Быйыл туостан үлэлэрбитинэн Галя Павлова “Инникигэ хардыы” НПК-ҕа улууска лауреаттаан, өрөспүүбүлүкэҕэ ситиһиилэнэн, аны бу дакылаатын Санкт-Петербурга ааҕа, бырайыакпытын билиһиннэрэ барар үрдүк чиэскэ тигистэ.

“Оһуор” муода устуудьуйата омук сирдэригэр тиийэ күрэхтэспит. Франция Париж куоратыгар, Германия Берлинигэр кинилэр тикпит таҥастарын биһирээбиттэр, саха оҕолорун талаанын сөҕө-махатайа көрбүттэр. “Оһуордар” бэйэлэрэ ол ыраах сырыыларын, айар айаннарын, оҕо саас умнуллубат үтүө өйдөбүлүн долгуйа ахталлар.

Билигин “Оһуорга” урут устуудьуйаҕа дьарыктаммыт оҕолор оҕолоро уһуйулла сылдьаллар. Онон учууталлара Туйара Дмитриевна “улахан оһуордар” уонна “кыра оһуордар” диэн таптаан ааттыыр.

Оһуор ойуута салааланан, сарбынньахтанан, сиэдэрэйдик салҕанан бара турарыныы, “Оһуордар” ити курдук ситимнэрин быспакка, утумнара салгыы сайда турдун.