Пандемия кэмигэр нэһилиэккэ ыһыах ыытыллыбатаҕын да үрдүнэн, түһүлгэҕэ тутуулары саҥардыы үлэлэрэ бу сааскыттан үрдүк тэрээһиннээхтик саҕаламмыта. Олохтоох дьаһалта “Норуот көҕүлээһинин өйөөһүн бырагыраамата” Саха Өрөспүүбүлүкэтин куонкуруһугар ситиһилэээхтик кыттан, 2022 сылга ыытыллар “Олоҥхо ыһыаҕар” бэлэмнэнии үлэлэлэр чэрчитинэн киэҥ далааһыннаах бырайыак олоххо киллэрэри ситиһиллэр. Биллэн турар, "Олоҥхо ыһыаҕа" диэн биир күннээх көрдөрүнньүк тэрээһин буолбатах. Сыл ахсын ыһыахха нэһилиэк олохтоохторо күүстээхтик бэлэмнэнэллэр, дьонун-сэргэтин олоҥхону кытта алтыһыннарар, билиһиннэрэр, уһуйар үлэлэлэри ыыталлар.
Ити курдук, бу күннэртэн бырайыак саҥа идеятын олоххо киллэрии үлэлэрэ саҕаланнылар. Бастатан туран, быйыл түһүлгэ сахалыы быһыылаах олбуора, түһүлгэҕэ киирии аарката оҥоһуллар, иккиһинэн, 2021 сылга сүрүн тутуулара оҥоһуллуохтара.
Бырайыак дизайнера Сайаана Саввина, Дьокуускайдааҕы художественнай училище выпускнига, кэскиллээх исписэлиис. Санатар буоллахха, кини көрүү-бырайыактарын эскииһинэн Кэнтик нэһилиэгэр элбэх тутуулар үлэҕэ киирбиттэрэ, ол курдук «Гармония» спортивнай-сынньанар аныгылыы оҕо былаһаакката, “Ким да умнуллубат, туох да умнуллубат” Кыайыы болуоссатын скверэ буолаллар.
Оттон саҥалыы ыһыах түһүлгэтин тутааччы хампаанньатынан, куонкурус кыайыылааҕа «Тутуу Саха» ХЭТ үлэлиир. Хампаанньа генеральнай директора Нюргун Саввин номнуо үһүс сылын салайар. Ол тухары Үөһээ Бүлүү улууһугар араас таһымнаах тутуулар үлэҕэ киирбиттэрэ дьон-сэргэ билэр, ону таһынан махтал тылларын тиэрдэллэр.
Хас биирдии бөдөҥ тутуулар, ордук ыһыах түһүлгэтин оҥоруу, саҥардыы сирин алдьатыах иннинэ алгыс маанылаах уот оттоллор. Үгэс быһыытынан алаадьынан, саламаатынан айах туталлар уонна кымыһы уот тула куталлар. Ол курдук, быйыл ыһыах түһүлгэтигэр алгыс мааныылаах “Эр киһи уонна дьахтар” 16 сэргэлэрин туруоруутун алгыһа ыытылынна. Маастардар Виктор Саввин, Павел Прокопьев, Александр Иванов уонна Майя Саввина маннык сэргэлэр бука оҕо-уруу, удьуор тэнийиитигэр туһуланаллар диэн быһаардылар.
«Тутуу Саха» ХЭТ үлэһиттэрэ, “Кэнтик нэһилиэгэ” МТ баһылыга Валерий Николаев, нэһилиэк олохтоохторо, алгысчыт Василий Алексеев салайыытынан, саха норуотун төрүт үгэстэрин тутуһан саҥа сэргэлэри алгыс тыла этиилээх түһэрдилэр. Бу талан ылбыт "Үрүҥ тунах ыһыах" ыһар сиригэр нэһилиэк олохтоохторо айылҕаҕа, өбүгэлэрин төрүт үгэстэригэр чугаһаабыт курдук сананаллар. Бэлиэ, быйылгы тутуу күнүттэн ыла элбэх сыралаах тутуу үлэтэ саҕаламмытынан ааҕыллар. Ити курдук, түҥ былыргыттан өбүгэлэрбит үгэстэрин үрдүктүк тутан, айылҕаны убаастаан, айыы итэҕэлинэн сиэттэрэн билиҥҥэ диэри сиэр-туом тутуһуллан тутуу үлэтэ ыытыллара кэскиллээх.
Дьокуускай-Үөһээ Бүлүү – Кэнтик.
- 0
- 0
- 0
- 0
- 0
- 0