Хас биирдии оскуолаҕа оҕо аймаҕы угуйар, билиитин хаҥатар сиринэн библиотека буолара саарбаҕа суох. Ол тускутунан Сунтаар улууһун Күүкэй оскуолата бастаан аһыллан үлэлиир кэмнэригэр, архыып докумуона көрдөрөрүнэн, 1921-22 үөрэх дьылыгар син балай да баай библиотекалаах эбит: ол иһигэр айылҕа үөрэҕэр – 42, историяҕа – 37, уус-уран литератураҕа - 94 учуобунньук, 165 кинигэ. Ити дьиҥнээх туоһутунан Самсоновтар педагогическай династияларын музейыгар 100-тэн тахса сыллааҕыта тахсыбыт  кинигэлэр хараллан сыталлара буолар.

• Бастыҥ ааҕааччылар

Библиотека -- информация киинэ. Кэрэни үксэтэр, билиини кэӊэтэр, олоххо баар сыаннастары харыстыыр, тэнитэр ураты суолталаах. Оҕо аймах сарсыарда оскуолаҕа мустуоҕуттан библиотека аана аһаҕас. Онон үөрэнээччи эбии билиини ыларыгар толору кыах бэриллэр.

• Оҕо кинигэтин күнэ

Оскуола библиотеката аныгы үөрэх ирдэбилин тутуһан үлэлиир. Пуонда библиотечнай-библиографическай классификациянан (ББК) салайтаран, сааһыланан, үөрэх литературата, учуобунньуктар уонна уус-уран литература пуондалара тус-туһунан хараллан тураллар.

• "Живая классика" фестиваль кыттыылаахтара

Биһиги библиотекабытыгар атын оскуолалардааҕар сэдэх кинигэлэрдээҕэ үөрдэр. Ордук элбэх кинигэнэн киэн туттар киһибит Александр Константинович Акимов байыппыта. Профессор Василий Васильевич Илларионов саха фольклоругар, олоҥхотугар аналлаах бэйэтин монографияларын, научнай-популярнай таһаарыыларын, редактордаан таһаарбыт кинигэлэрин үөрэммит оскуолатын библиотекатыгар анаан бэлэхтээбитэ. Ѳссө биллиилээх учуонайдар В.Г.Кривошапкин, Е.Г.Егоров, Т.П.Самсонова, доцент А.А.Васильев бэлэхтээбит кинигэлэрэ анал кэбиниэттэригэр хараллан туһаныллаллар.

• "Есенини ааҕабыт" 

 Ийэ дойдуга сэрии ыарахан кэмнэригэр Күүкэй оскуолатыгар үөрэммит медицинскэй наука дуоктара, профессор В.Г.Кривошапкин ахтарынан, оскуола  библиотекатыгар нуучча улуу суруйааччыларын айымньыларын умсугуйан аахпыт. Ити сылларга тулаайах хаалбыт, кэлин экономическай наука доктора, СѲ НА академига буолбут Е.Г. Егоров  интэринээккэ олорон, кыһыҥҥы уһун киэһэлэргэ элбэх кинигэни ааҕан, оскуоланы үчүгэйдик бүтэрбитэ. Оттон филологическай наука доктора, профессор В.В. Илларионов оччолорго Г.У.Эргис таһааттарбыт «Ньургун Боотур» олоӊхотун сахалыытын бэркэ эриһэн туран аахпытын уонна кылаас иннигэр кэпсээбитин ахтыбыта баар. Үгүс киһи ахтарынан, экономическай наука доктора, профессор, академик А.К.Акимовы оҕо сааһыгар кинигэ кыбыныылаах сылдьарын өйдүүллэр.

• Нуучча тылыгар сөбүлүүр айымньыларын кэпсииллэр

Улахан дьоммут тыыннаах холобурдарыгар, үрдүк ситиһиилэригэр олоҕуран, билиӊӊи ыччаты ааҕыыга сирдиир сырдык суол гынабыт. Оскуолабыт маӊнайгы учуутала Парфений Никитич Самсонов кинигэни элбэхтик ааҕар оҕо улам-улам ордук үчүгэйдик үѳрэнэрин бэлиэтээн эппитин тутуһабыт.

• "Кэскил" хаһыат балаһаларынан квест-оонньуу

Билиӊӊи ыччат оскуола библиотекатын туһунан чопчу туох өйдөбүллээхтэрин билсиһиннэрэбит: 

 “Элбэҕи билэр-көрөр сирбит”,  --   Арсалан Кириллин.

“Сөбүлүүр сурунаалым «Мир техники», ону ааҕаары киирэбин”, --  Денис Харитонов.

“Наша библиотека оснащена современными книгами”, --   Илья Федоров.

“Талбыт кинигэҕин ааҕар сир”,  --  Ньургун Терентьев.

“Манна слайданан оонньууну, биктэриинэни сөбүлүүбүн”,  --  Дьулустаан Сидоров.

“Библиотека -- саамай чуумпу сир”, --  Дамир Львов.

 Дьэ, бу библиотека туһунан иһирэх өйдөбүллэрэ үөрдэр, үлэҕэ саӊалыы хайысханы киллэрэргэ кынаттыыр.

• "Ийэ тылбынан ирэ-хоро кэпсэтиим" аахсыйа

Тэрээһиннэр аныгылыы технологияны туһанан ыытыллаллар. Ааҕыыны көҕүлүүр сыалтан араас дириӊ ис хоһоонноох аахсыйалар буолаллар: «Ийэ тылбынан ирэ-хоро сэһэргиим», «Живая классика», «Живая страница», «Читаем А.Барто», о.д.а.. Үбүлүөйдээх суруйааччыларга ааҕыы күрэҕэр, НПК-ларга тиһигин быспакка кыттаннар, бириистээх миэстэҕэ тиксэллэр. Ордук ситиһиилээх үөрэнээччилэринэн Саввинова Алима (II кыл), Федорова Сулустаана (VII кыл.), Егорова Анжелика (IX кыл.), Сидорова Ньургуйаана (IX кыл.) буолаллар.

• Кылаастарынан библиотечнай уруоктар

Бүтүн дойду үрдүнэн ыытыллар күрэхтэргэ биһиги оҕолорбут үөлээннээхтэриттэн хаалсыбакка кытталлар. Маныаха икки тылы тэӊинэн тутан сайдалларыгар болҕомто ууруллар. Кэтэхтэн куйаар ситиминэн ыытыллар оонньуулар дьиэ кэргэн бары кытталларыгар табыгастаах эбит. Биир сомоҕо күүс буолан, биир сыалга-сорукка түмүллэн көхтөөхтүк, сабыстыбакка дэлэччи кытталлар.

• Көһө сылдьар библиотека

Мин, үлэһит быһыытынан, бэйэм санаабар, кинигэни умсугуйан аахпат төрүөтэ үөрэнээччи тылын саппааһа дьадаӊытыттан, тылы дириӊник хорутан билбэтиттэн тутулуктаах. Бу итэҕэһи көннөрөргө бастаан оҕо сатаан саӊарарын, тылы таба туттан кэпсэтэрин ситиһэр ордук. Маныаха тылынан остуол оонньууларын туһанар табыгастааҕын бэлиэтии көрөбүн. Оҕо  ааҕа олорон, хараҕар ойуулаан көрөрүн ситиһэр ньыманан айымньы түһүмэхтэринэн уруһуйдаан көрдөрөрүн элбэхтик туһанар түмүктээх, бэйэтин уруһуйунан толору ис хоһоонун арыйан кэпсиэн, суруйуон сөп. Кылаас таһынан ааҕыыны араас ньыманы туһанан, оҕону ааҕыы эйгэтигэр сиэтэн киллэрэри табыгастаахтык туһанар үтүө төрүтү аҕалара саарбаҕа суох. Бу библиотекарь ытык эбээһинэһэ буоларын умнумуох кэриӊнээхпит.

Оҕону иитии-үөрэтии биир сүрүн хайысхатынан библиотека, кинигэ нөҥүө ыытыллар. Оскуола сайдар кыаҕын толору туһанарыгар библиотека төһүү тирэх буолан, үөрэҕирии систиэмэтин ирдэбилинэн үүнэрэ-кэӊиирэ олох ирдэбилэ. Маныаха туһааннаах үлэһит улахан эппиэтинэһи сүгэр.

Ксения Егоровна Саввинова,

Күүкэй оскуолатын библиотекэра,

Сунтаар.