Тыйаатыр дириэктэрэ Александр Алексеев  саҥа 42-с театральнай дьыл саҕаламмытынан тыйаатыр кэллэктиибин аатыттан эҕэрдэ тылларын, кэлбит көрөөччүлэргэ махталын тиэртэ, ону таһынан, үлэ былаанын билиһиннэрдэ. Көрөөччү өрүү тыйаатыры сөбүлээн, таптаан, кэлэ турарыгар баҕа санаатын эттэ. Кэнсиэри Елизавета Макарова иилээн-саҕалаан ыытта.  

Ырыа киһи дууһатын сылаанньытар, оттон тыыннаах доҕуһуол толорууну истэр икки төгүл кэрэ, алыптаах ураты эйгэни үөскэтэр. Ону көрөөччүлэр олус истиҥник, эппитинэн-хааммытынан ылынныбыт. Артыыстар уонна оркестр биллэр композитордар суруйбут сахалыы, нууччалыы уонна омук киэҥник биллэр айымньыларын толордулар. Чахчы, оркестр солистара Владимир Боярскай, Виктор Винокуров – Дабайаан байааҥҥа оонньууллара кэрэхсэбиллээх, үрдүк таһымнаах. Сыанаҕа хас биирдии тахсыылара ытыс тыаһынан доҕуһуолланна. Артыыс киһиэхэ бу улахан суолталаах буоллаҕа эбээт!.. Туспа хайхабылы уһулуччулаах талаан –  кылаабынай дирижер, Николай Петров уонна оркестр артыыстара ыллыллар. Кэнсиэри В.Гридин инструментовкатыгар, Д.Голубев «Рассыпуха» айымньытынан түмүктээтилэр.

«Мин санаабар, барыта үчүгэйдик ааста. Дьон сэҥээрдэ, үөрүүбүт үгүс. Профессиональнай өттүттэн сыаналыыр эбит буоллаххына, кыра алхастар таҕыстылар, ол да буоллар, саамай сүрүнэ диэн тыыннаах доҕуһуол буоллаҕа. Бу барыта сыралаах үлэттэн, элбэх дьарыктан тахсар. Көрөөччү сэҥээрбит, ол аата биһиги сыалбытын сиппиппит!», – диэн кэнсиэр кэнниттэн Виктор Винокуров – Дабайаан санаатын үллэстэр.

Санатан эттэххэ, Владимир Боярскай – биллэр музыкант, виртуоз баянист, норуоттар икки ардыларынааҕы, арассыыйатааҕы уонна өрөспүүбүлүкэтээҕи куонкурустар лауреаттара. Национальнай үҥкүү тыйаатырын саха национальнай инструменнарын оркестрын сүрүн солиһа. Аартыкатааҕы култуура уонна ускуустуба судаарыстыбаннай институтун преподавателэ. М.Н.Жирков аатынан Дьокуускайдааҕы муусука колледжын (училищетын) 2005 сыллаах, Гнесин аатынан Арассыыйатааҕы судаарыстыбаннай академия 2010 сыллаах выпускнига. Үҥкүү национальнай тыйаатырыгар 2011 сылтан үлэлиир. Кини таһаарыылаах, айымньылаах үлэтэ дьон интэриэһин тардар. Ол курдук, араас таһымнаах улахан куонкурустарга, кэнсиэрдэргэ куруук ыҥырыллан, кыттыыны ылар.

Оттон Виктор Винокуров – Дабайаан – талааннаах баянист, өрөспүүбүлүкэ музыкальнай эйгэтигэр биллэр киһи. Кини Винокуровтар музыкант дьиэ кэргэн династиятын салҕааччы буолар. 2006 сыллаахха М.Н.Жирков аатынан Дьокуускайдааҕы муусука колледжын (училищетын) Р.Н.Крылова байаан кылааһын бүтэрбит. Салгыы 2011 сыллаахха Аартыкатааҕы култуура уонна ускуустуба судаарыстыбаннай институтун Н.В.Пикутскай, В.И.Боярскай байаан кылаастарыгар үөрэммит. 2012-2013 сылларга Национальнай үҥкүү тыйаатырын оркестрын артыыһынан үлэлээбит. Ол кэннэ арассыыйа аармыйатыгар сулууспалаабыт. Салгыы тыйаатырыгар төҥнөн, айымньылаах үлэтин салҕаабыт. Оркестрга байааҥҥа, ону тэҥэ кылыһах-альтка оонньуур. Норуоттар икки ардыларынааҕы, өрөспүүбүлүкэтээҕи куонкурустар кыайыылааҕа, лаурета. Үҥкүү тыйаатырын араас бырайыактарын, кэнсиэрдэрин сүрүн солистарыттан биирдэстэрэ буолар.