Мунньах киирии тылыгар Айсен Сергеевич өрөспүүбүлүкэҕэ эбийиэктэри талыыга уонна тутуу барыахтаах миэстэлэрин быһаарыыга, ВЭБ РФ судаарыстыбаннай хампаанньа үлэтин былаанын оҥорууга улахан үлэ барбытын бэлиэтээтэ.
Судаарыстыбаннай хампаанньаны кытта концессионнай сөбүлэҥ чэрчитинэн Мархаҕа, Тулагыга, Хатаска, Табаҕаҕа, Севернай микрооройуоҥҥа, Сайсар, Автодорожнай, Гагаринскай, Строительная уокуруктарга оскуолалар тутуулара былааннанар.
Мунньах кэмигэр өрөспүүбүлүкэ экэниэмикэҕэ миниистирэ Майя Данилова, үөрэх миниистирэ Михаил Сивцев, СӨ Ил Дарханын иһинэн архитектураҕа уонна куораты тутууга салаа салайааччыта Ирина Алексеева уонна куорат баһылыгын э.т. Евгений Григорьев эбийиэктэр былааннарын кытта билиһиннэрдилэр.
Үөрэх миниистирэ Михаил Сивцев уонна куорат баһылыгын э.т. Евгений Григорьев Дьокуускай иһигэр тутуу барыахтаах сир учаастактарын испиэһэгэ номнуо быһаарыллыбытын иһитиннэрдилэр. Ол курдук, уопсайа 8520 үөрэнээччигэ 12 эбийиэк тутуллара наада диэн эттилэр. Ити үксэ 990 миэстэлээх оскуолалар.
Евгений Григорьев кэлэр сыл олунньутуттан 8 учаастакка тутууну саҕалыахха сөп диэн эттэ. Онтон бэс ыйыгар хаалбыт 4 учаастак бэлэм буолаллар диэтэ.
Ил Дархан Айсен Николаев ВЭБ.РФ хампаанньаны кытта бииргэ үлэлээһин барыла номнуо бэлэмин иһитиннэрдэ уонна өссө төгүл эбийиэктэр олоххо киирэр түһүмэхтэрин бэрэбиэркэлииллэригэр, экэниэмикэ уонна үөрэх министиэристибэлэрин, Дьокуускай дьаһалтатын кытта чопчулуулларыгар сорудахтаата.
СӨ Ил Дарханын уонна Бырабыыталыстыбатын пресс-сулууспатын матырыйаалынан.
Андрей Сорокин хаартыскаҕа түһэриитэ.
-
0
-
0
-
0
-
0
-
0
-
0
