Быйыл 8284 үөрэнээччи оскуоланы бүтэрдэ. Биир кэлим эксээмэни 5950 оҕо туттарбыт. Ол онтон 30 бүтэрээччитэ  БКЭ-ни 100 баалга туттарда. Холобур, Нерюнгри куорат 1-кы №-дээх гимназиятын бүтэрбит Ангелина Шавейко химия уонна биология эксээмэннэрин 100 баалга туттарда. 13 выпускник нуучча литературатын эксээмэнигэр 100 баалга ыллылар. Быйыл аан бастаан информатика предметигэр эксээмэн саҥалыы компьютернай ньыманан ыытыллыбыт, бу эксээмэни 4 үөрэнээччи 100 баалга туттарбыт.

Уһук Илин эрэгийиэннэргэ бастыҥ оскуола буоларын өссө төгүл Өрөспүүбүлүкэтээҕи лицей-интернат туоһулаата. Лицейи 140 оҕо бүтэрбититтэн, 8 выпускнига араас предметтэргэ БКЭ-ни 100 баалга туттарбыт.

  Дьокуускайдааҕы лицей 3 оҕото,  Мииринэй куорат 24-с  №-дээх оскуолатын 2 үөрэнээччитэ 100 баалга туттараннар,  бу кыһалар үрдүк таһымнаахтык билиини биэрэллэрин туоһулаатылар.

Литература эксээмэнигэр уһулуччу баалы тыа сирин оскуолаларын үөрэнээччилэрэ ыллылар: Мэҥэ Хаҥалас улууһун Хаптаҕай нэһилиэгин уонна Майа сэлиэнньэтин орто оскуолаларын, Сунтаар политехническай лицейин, Бэрдьигэстээх гимназиятын, Чурапчы гимназиятын выпускниктара.

Ил Дархан Айсен Николаев сылын аайы үөрэтэн таһаарбыт выпускниктара эксээмэҥҥэ 100 баалы ылар учууталларга  махтанна. Ол курдук, Өрөспүүбүлүкэтээҕи лицей-интэринээт педагогтара Зоя Петровна Холмогороваҕа, Мария Ивановна Уваровскаяҕа, Виктор Филиппович Потаповка эҕэрдэ тыллара ананна.  

Өрөспүүбүлүкэ баһылыга БКЭ-ни 100 баалга туттарбыттар 15 тыһ. солк., кинилэри үөрэппит учууталлара 20 тыһ. солк. бириэмийэнэн наҕараадаланалларын туһунан иһитиннэрдэ.