Көҕүлээһин ааптардарынан Федерация Сэбиэтин вице-спикерэ Андрей Турчак уонна Госдума иһитиннэрии политикатыгар, иһитиннэрэр технологияларга уонна сибээскэ кэмитиэтин баһылыга Александр Хинштейн буоллулар.
«Чунуобунньуктар дьоҥҥо сыһыаннаан, сымнатан эттэххэ, сөбө суохтук быһыыланар түгэннэрин биирдэ эрэ көрсүбэтэхпит», — диэн бэлиэтээбитэ бу иннинэ Андрей Турчак.
Сенатор санаатынан, хас биирдии маннык түгэн судаарыстыба аптарытыатын түһэрэр, уопсастыбаҕа туһааннаах абарыыны-сатарыыны үөскэтэр. Сокуону оҥорооччу бэлиэтииринэн, бүгүҥҥү күҥҥэ диэри итинник көстүүлэр сокуонунан сүрүннэммэт этилэр, олору ханнык эмэ салайааччыны кытыннаран быһаарыллара.
Чунуобунньуктар бардам быһыыларын туһунан сокуон барыла РФ Президенэ үөҕүү, атаҕастааһын иһин эппиэтинэһи күүһүрдүүгэ сорудаҕын толорор сыалтан оҥоһуллубут итиэннэ номнуо бырабыыталыстыба өйөбүлүн ылбыт.
Докумуон быһаарыы суругар гражданнары, ол иһигэр сонуну тарҕатар ситимнэр нөҥүө, сэнэбилтэн, чиэстэрин уонна дьоһуннарын көмүскээһин билигин баар механизма сөптөөх көдьүүһэ суоҕун туһунан этиллэр.
РФ КоАП (административнай сокуону кэһиилэр кодекстара) 5.61 ыстатыйатыгар («Атаҕастааһын») сөп түбэһиннэрэн маннык дьайыы булгуччулаах сыаналанар бэлиэтинэн кини сүөргү көрүҥэ буолар. Барыл быһаарыытыгар бэлиэтэнэринэн, киһи чиэһин уонна дьоһунун түһэрии булгуччу итинник түктэри көрүҥнээх буолар дэниллибэт. Үөһэ ыйыллыбыт ыстатыйаҕа судаарыстыбаннай эбэтэр муниципальнай дуоһунастаах сирэйдэргэ дьону атаҕастаабыттарын иһин эппиэтинэс көрүллүбэт.
«Биир ньыгыл Россия» оҥорбут сокуонун барылыгар гражданнарга эбэтэр бөлөх дьоҥҥо, ол иһигэр сонуну тарҕатар, иһитиннэрэр ситимнэр, Интернет нөҥүө сүөргү уонна да атын сэнэбиллээх сыһыаны таарыйар көннөрүүлэри киллэрэргэ этэллэр. Ону сэргэ судаарыстыбаннай эбэтэр муниципальнай сололоох киһи бэйэтин боломуочуйаларын толорорунан сибээстээн оҥорбут итинник дьайыыларын иһин накаастабылы олохтуурга этиллэр.
Чунуобунньук бэйэтин боломуочуйаларын толорор кэмигэр гражданины үөхтэҕинэ, атаҕастаатаҕына, кини бөдөҥ ыстараабы төлүөҕэ уонна үлэтиттэн туоратыллыан сөп. Сокуону бастакытын кэстэҕинэ – биир сылга диэри, иккиһин кэһиитигэр – 2 сылга диэри болдьоххо. Ону таһынан, 50-тан 100 тыһыынча солк. диэри ыстарааптаныан сөп, хаттаан кэһиигэ – 100-тэн 150 тыһ. солк. диэри.
«Ити састаап үлэлиирин курдук, киһи бэйэтин сулууспалаах эбээһинэстэрин толорор кэмэ булгуччулаах буолбатах, — диэн бу иннинэ Александр Хинштейн «Парламент хаһыатыгар» быһаарбыта. — Чунуобунньук социальнай ситимнэргэ эбэтэр дьону кытта суруйсарыгар бардамнаатаҕына, ол эрээри киэһэ, түүн, сынньалаҥ күнүгэр үлэтин толорбот кэмэ түбэстэҕинэ, маныаха кини син биир чунуобунньук быһыытынан буолар».
-
0
-
0
-
0
-
0
-
0
-
0
