Саха Өрөспүүбүлүкэтин Тутууну уонна дьиэни-уоту хонтуруоллуур судаарыстыбаннай управлениетын салайааччытын бастакы солбуйааччы Влад Михайлович Пермяков хоруйдуур.

 --Уу хаачыстыбата физическэй уонна химическэй састаабынан (өҥө, сыта, кумахтаах дуу, туох эрэ булкаастаах дуу, төһө дьэҥкирэ-өлбөөркөйө, о.д.а.) ирдэбилгэ эппиэттээбэт буоллаҕына, Роспотребнадзор управлениетыгар сайабылыанньа суруйуоххутун наада. Кинилэр иһэр уу хаачыстыбатын бэрэбиэркэлиир эбээһинэстээхтэр.

 РФ сокуонунан ууну араарар бириэмэ эмиэ хааччахтаах, үлүбээй  буолуо суохтаах. Ол курдук, Тутуу нуорматын уонна быраабылатын (СНиП) 2.04.02-84 пуунугар сурулла сылдьар: тымныы уу систиэмэтин өрөмүөннүүр буоллахтарына, ыйга барыта холбоон 8 чаас, оттон уу киин ситимигэр саахал тахсыбытын туоратарга биирдэ 4 чаас араарыахтарын сөп. Ол эрээри алдьаныыта улахан буоллаҕына, ити бигэргэтиллибит бириэмэттэн уһуон сөп, оннук көҥүллэнэр.

 Итии ууну араарыы болдьоҕо эмиэ итинник. Арай “тупиковая магистраль” дэнэр тиһигэ алдьаннаҕына, 24 чаас араарыахтарын сөп. Сыл аайы ыытыллар профилактическай өрөмүөн кэмигэр 14 сууккаттан уһуннук араарыа суохтаахтар.

 Былаан быһыытынан араарар буоллахтарына, ол туһунан дьиэ олохтоохторун 10 күн инниттэн сэрэтиэхтээхтэр. Аны туран, ити үөһэ этиллибит төрүөттэринэн буолбакка, атын биричиинэнэн араарбыт буоллахтарына, кыбартыыра хаһаайыттара коммунальнай өҥө төлөбүрүн кыччатан аахтарар бырааптаахтар.

СанПин нуорматынан, сарсыарда 5 чаастан киэһэ 24.00 чааска диэри тымныы уу 20 кыраадыстан намыһах буолуо суохтаах, итии уу температурата 60-75 кыраадыска тэҥнэһиэхтээх. Түүнүн ити нуорматтан тахсыан-түһүөн сөп.

Уунуу араарыыга, уу кыраадыһыгар сөпсөспөт этиилэрдээх буоллаххытына, бастаан коммунальнай өҥөнү оҥорор тэрилтэҕитигэр (УК, ТСЖ, ЖСК) сибээскэ тахсыҥ. Ылыммат эбэтэр толороллоруттан аккаастанар буоллахтарына, биһиэхэ суругунан үҥсүҥ.