Ил Түмэн үлэлиир бөлөҕө биирдиилээн дьону уонна нэһилиэнньэни кытта көрүстэ. Көрсүһүүлэргэ нэһилиэнньэ улуус социальнай экэнэмиичэскэй сайдыытыгар сыһыаннаах сытыы кыһалҕалары көтөхтө. Ол курдук, муомалар оскуолаларын киин ититэр ситимҥэ холбооһуну, мусуой саҥа дьиэтин тутуутун, инбэлииттэр доруобуйаларын чөлүгэр түһэрэр киин тутуутун туруорустулар. Ону сэргэ, халаан уутуттан куттаналларын биллэрдилэр.
Парламентарийдар улуус дьокутааттарын Сэбиэтин кытта сытыы кыһалҕалары быһаарыстылар. Манна бэлиэтээн эттэххэ, муус устар 2 күнүгэр Ил Түмэн ыччакка, физическэй култуураҕа уонна спорка сис кэмитиэтэ Хонуу сэлиэнньэтигэр Муома улууһун социальнай экэнэмиичэскэй сайдыытыгар аналлаах “төгүрүк остуолу” ыыппыта.
“Муома улууһун олоҕун-дьаһаҕын, үлэтин-хамнаһын кытта билистибит...”
Муоматааҕы сырыы туһунан Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин субу курдук кэпсээтэ:
– Үтүө үлэһит дьонноох, кэрэ айылҕалаах Муома улууһун олоҕун-дьаһаҕын, үлэтин-хамнаһын билсэн кэллибит.
Мин салайар сис кэмитиэтим иһинэн туруорсар боппуруостарын таарыйар эбит буоллахха, ынах сүөһүнү иитэр хас да чааһынай хаһаайыстыбаҕа, сылгыны көрөр бааһынай хаһаайыстыбаҕа сылдьыы түмүгүнэн, сылгыны иитиигэ саҥа хамсааһыннар тахсан эрэллэрин кэпсээтилэр, онтон ынах сүөһү ахсаана көҕүрүү турара харахха быраҕыллар. Сүрүн төрүөтэ - көрөр дьон сааһырыыта уонна үүтү-эти оҥорон таһаарыы суоҕа буолар. Ол эрээри улуус баһылыга Павлов И.П., бастакы болдьоҕор талыллан саҥа үлэлээн эрэр баһылык, тыа хаһаайыстыбатын миниистирин солбуйааччынан үлэлээбит уопуттаах салайааччы, инникигэ бэйэтэ көрүүлэрдээх, кэккэ этиилэрдээх.
Ол курдук, эдэр ыччат кэлэн олохсуйарыгар, дьиэ туттарыгар квоталааһыны уонна агростартап курдук саҥа хаһаайыстыбаны тэринээччилэргэ тыа хаһаайыстыбатын министиэристибэтэ Арктика улуустарыгар туспа куонкурус оҥорон, туһунан кубуоталыыра буоллар диэн этэр. Итиэннэ эбиэс, уотурба кэлиитигэр, от тиэйиитигэр курдук, тиэйэн аҕалыыга чэпчэтии баара буоллар диир.
Биир уустук боппуруоһунан, кулун тутар 31 күнүттэн олохтоох бэтэринэриийэ Чурапчы улууһун бэтэринэриийэтин кытта холбоммутун бэлиэтээтилэр. Бу хайысхаҕа балаһыанньа уустугуруох курдук, эминэн да хааччыллыы, эбийиэктэрин да ититии төлөбүрүгэр иэскэ киирбиттэр. Маны салгыы быһаарсар наада буолбут.
"Якутопторг" тэрилтэни күүскэ өйүүргэ эттилэр, бу эрэ тэрилтэ сүрүн бородууксуйа сыанатын тутар кыахтаах эбит. Дьоҕус урбаанньыттар сыаналара ыарахан. Биллэн турар, көтөр аалынан айан сыаната ураты ыараханын өссө төгүл тоһоҕолоон эттилэр.
Таба иитиитигэр билиҥҥитэ былааннаах үлэ барар.
Бу этиллибит барыта боротокуолланан, салгыы Бырабыыталыстыба таһымыгар туруорсууга киириэ.
- 0
- 0
- 0
- 0
- 0
- 0