ГосДума депутаттара бастакы ааҕыыга биэнсийэлээхтэр, ону таһынан “хоруона” хамсыгын кэмигэр ордук эмсэҕэлээбит экэниэмикэ салааларыгар киирэр орто уонна дьоҕус урбаан тэрилтэлэрин иэстэрин төлөбүрүн болдьоҕун уһатар туһунан сокуон бырайыагын ылыннылар.

Сокуон бырайыагын “Биир ньыгыл Арассыыйа” фракциятын салайааччыта Сергей Неверов уонна информационнай бэлиитикэҕэ, информационнай технологияларга уонна сибээскэ сис кэмитиэт бэрэссэдээтэлэ Александр Хинштейн киллэрэн билиһиннэрдилэр.

Докумуоҥҥа этиллэринэн, кырдьаҕастарынан, инбэлииттэринэн биэнсийэ ылааччылар эбэтэр иитээччилэрин сүтэрбиттэринэн биэнсийэлээхтэр хамнас алын төлөбүрүн кээмэйиттэн (МРОТ) 2 төгүл аччыгый биэнсийэлээх уонна онтон атын дохуоттара суох буоллаҕына, 1 мөл. солк иһинэн иэстэригэр төлөбүрдэрин болдьоҕун уһатар кыахтаналлар.

Маннык болдьоҕу уһатыы биирдэ эрэ бэриллэр уонна 2 сылтан ордук уһун буолуо суохтаах.

Эмсэҕэлээбит салааларга киирэр урбаанньыктарга, өскөтүн иэстэрэ 15 мөл солк аччыгый буоллаҕына, нолуокка, страховой усунуоска уонна кирэдьииккэ төлөбүрдэрин 1 сылга уһатан биэриэхтэрин сөп.

Өскөтүн сокуон бырайыага бигэргэннэҕинэ, алтынньы 1 күнүгэр диэри иэстээх урбаанньыктартан уонна биэнсийэлээх гражданнартан күүс өттүнэн иэстэрин төлөтөр миэрэлэр туттуллуохтара суоҕа: иэстээх киһи үбүгэр-малыгар бобуу ууруу эбэтэр иэһин суотугар былдьааһын тохтотуллуо. Манна тырааныспар эрэ киирбэт, ол аата тырааныспарга бобуу ууруохтарын эбэтэр иэс суотугар ылыахтарын сөп. 

Куттал суох буолуутун уонна бэрик ылыытын утары үлэни сүрүннүүр сис кэмитиэт бэрэссэдээтэлэ Василий Пискарев ыйыллыбыт чэпчэтиинэн 3 мөлүйүөн кэриҥэ дьоҕус тэрилтэ уонна урбаанньыт, балтараа мөлүйүөнтэн тахса биэнсийэлээх туһаныан сөп диэн бэлиэтээтэ. Иэс төлөбүрүгэр болдьоҕу уһатыахтарын баҕарааччылар, сокуон бырайыага бигэргэнэр түгэнигэр, суут приставтарын федеральнай сулууспатыгар тиийэн сайабылыанньа суруйаллар. Ону көрүү уонна сөптөөх быһаарыныыны ылыныы түргэн уонна судургу буолуо диэн мэктиэлээтэ.

“Алтанньы 1 күнүгэр диэри иэстээх дьон бас билиилэригэр мораторий киллэрэбит. Бүгүҥҥү уустук балаһыанньаҕа, үлэлэрин уонна урукку дохуоттарын сүтэрбит дьон, саамай наадалаах бас билиилэрин, малларын сүтэриэ суохтаахтар”, – диэн Василий Пискарев эттэ.